Ўзбекистонда 2025 йилда электрон хизматлар соҳасида хорижий энг йирик солиқ тўловчи Apple бўлди. Бу ҳақда Солиқ қўмитаси хабар қилди.
Қайд этилишича, ўтган йилда электрон хизматлар кўрсатувчи 78 та хорижий компания томонидан 181,3 миллиард сўм солиқ тўланган. Бу 2024 йилга қараганда 50 фоизга кўпроқдир.
Энг кўп солиқ тўлаганлар рўйхатида Apple етакчи — 49,5 миллиард сўм тўлов. Ундан кейинги ўринларда Мета 49 миллиард сўм, Google 44,4 миллиард сўм ва OpenAI 11,7 миллиард сўм билан ўрин эгаллаган. Шунингдек, Booking.com томонидан 4,3 миллиард сўм солиқ тўланган.
Қолган йирик компаниялар бўйича рақамлар қуйидагича:
- TikTok — 3,5 миллиард сўм;
- Netflix — 1,8 миллиард сўм;
- Аccа — 1,6 миллиард сўм;
- Xsolla — 1,5 миллиард сўм;
- Amazon — 1,4 миллиард сўм.
Электрон хизматлар кўрсатувчи чет эл юридик шахслари ўтган чоракдан кейинги ойнинг 20-кунидан кечиктирмай, солиқ ҳисоботларини тақдим этади ва солиқларни тўлайди.
