Бугун, 15 ноябрь куни Кўксарой қароргоҳида Қозоғистон Республикаси Президенти Қосим-Жомарт Тўқаевга Ўзбекистон Республикасининг олий давлат мукофоти – “Олий Даражали Дўстлик” орденини топшириш маросими бўлиб ўтди. Бу ҳақда Президент матбуот хизмати хабар берди.
Ўзбекистон раҳбари Шавкат Мирзиёев мукофотни топширар экан, Қозоғистон Республикаси Президентининг икки қардош халқ ўртасида дўстлик, яқин қўшничилик, стратегик шериклик ва иттифоқчилик муносабатларини мустаҳкамлаш йўлидаги улкан шахсий хизматларини алоҳида қайд этди.
“Сизни, мамлакатимизга катта дўст бўлган ардоқли зотни, Ўзбекистоннинг энг юксак давлат мукофоти – “Олий Даражали Дўстлик” ордени билан тантанали равишда тақдирлаш мен учун катта шарафдир. Бу – кўп миллатли Ўзбекистон халқи томонидан Қозоғистон Республикаси Президентининг улкан хизматларига бўлган самимий ҳурмат ва эътироф ифодасидир. Бизнинг юртимизда Сизни дунёга машҳур, таниқли давлат арбоби ва сиёсий етакчи сифатида яхши билишади. Бугун Сизнинг оқилона раҳбарлигингиз остида Адолатли Қозоғистонни барпо этиш бўйича кенг кўламли ислоҳотлар амалга оширилмоқда. Барча соҳаларда улкан бунёдкорлик ишлари олиб борилмоқда. Қозоғистонликларнинг фаровонлиги изчил ошмоқда ва энг муҳими – уларнинг эртанги кунга бўлган ишончи мустаҳкамланмоқда. Биз яқин дўст ва қўшни сифатида Қозоғистоннинг ютуқларидан чин дилдан хурсандмиз”, деди Шавкат Мирзиёев.
Биргаликдаги саъй-ҳаракатлар туфайли икки халқ ўртасидаги муносабатлар мутлақо янги тараққиёт даражасига чиқиб, намунали аҳамият касб этгани таъкидланди. Қайд этилишича, парламентлар, ҳукуматлар, ҳудудлар, бизнес, жамоатчилик ва ёшлар фаол ҳамкорлик қилмоқда, маданий ва гуманитар алмашинувлар кенгайиб бормоқда, савдо айланмаси барқарор ўсиб бормоқда, саноат, қишлоқ хўжалиги, энергетика ва транспорт соҳаларида йирик кооперация лойиҳалари амалга оширилмоқда.
Қосим-Жомарт Тўқаевнинг глобал миқёсда тинчлик ва барқарор ривожланишни таъминлаш, шунингдек, минтақада ишонч, ўзаро ҳамжиҳатлик ва шериклик муҳитини мустаҳкамлаш борасидаги саъй-ҳаракатлари алоҳида қайд этилди.
Қозоғистон Президенти Ўзбекистон раҳбари ва Ўзбекистон халқига бундай юксак мукофот учун миннатдорлик билдирди ҳамда қардош мамлакатлар ўртасидаги дўстлик ва иттифоқчилик руҳидаги муносабатлар янада мустаҳкамланишига ишонч билдирди.
“Бу юксак мукофот дўстлик, тинчлик ва ҳурмат ғояларини мужассам этган бўлиб, улар қозоғистонликларнинг қалбига яқин ва ўзбек халқи руҳига мос қадриятлардир. Орденнинг номи мамлакатларимиз ўртасидаги муносабатларнинг моҳиятини тўла акс эттиради. Қозоғистон ва Ўзбекистон дўстлиги – бу бебаҳо бойлик бўлиб, биз уни биродар халқларимизнинг фаровонлиги учун эҳтиёткорлик билан асраймиз ва ривожлантирамиз. Ишончим комилки, қўшма ва тинимсиз саъй-ҳаракатларимиз туфайли қозоқ-ўзбек стратегик шерикчилиги ва иттифоқчилиги янги мазмун билан бойиб боради. Буюк Абай ва Навоий дўстлик ғояларини ҳар бири ўзига хос тарзда улуғлаб, бизга бебаҳо васият қолдирган: ишонч халқларни яқин қилади, ўзаро ҳурмат эса уларни кучли қилади. Ана шу насиҳатларга амал қилган ҳолда, биз Ўзбекистон билан дўстона иттифоқимизни мустаҳкамлашга алоҳида аҳамият берамиз”, деди Қосим-Жомарт Тўқаев.
