Бухоро вилоятида ўтказилган Халқ депутатлари вилоят кенгаши сессиясида вилоят ҳокими Ботир Зарипов туризм соҳасининг жорий йилдаги ривожи ва истиқболлари ҳақида маълумот берди.
Туризм соҳаси Бухоро иқтисодиётнинг асосий ўсиш бўғинига айланган. 2025 йил якунигача сайёҳлар сонини 7,2 миллион нафарга, шундан хорижий туристлар оқимини 2,5 миллион нафарга етказиш режалаштирилган.
Жорий йилда туризм хизматларидан 680 миллион доллар миқдорида тушум кутилмоқда. Шу билан бирга, туризм ва унга ёндош соҳаларда 1,3 мингта (йиллик 8,5 минг нафар) янги иш ўрни яратилиши кўзда тутилган.
Пешку туманидаги Афшона қишлоғида — буюк аллома Абу Али ибн Сино туғилган масканда “Этник туризм шаҳарчаси” ташкил этилиши маълум қилинди. Шунингдек, соҳил бўйларида “пляж зоналари” ва кўл бўйларида сайилгоҳлар барпо этиш бўйича “мастер режа” ишлаб чиқилиб, тадбиркорларни жалб этиш режалаштирилган.
Бундан аввал 5 сентябрдан 15 октябргача бўлган даврда вилоятда туризм соҳасида сезиларли ўсиш кузатилгани ҳақида хабар берилганди. Шу вақт мобайнида вилоятга жами 1 миллион 224,2 минг нафар сайёҳ ташриф буюрди.
Бу кўрсаткич ўтган йилнинг мос даврига нисбатан 1,6 бараварга кўпдир. Ташриф буюрганларнинг 570,8 минг нафари хорижий, 653,4 минг нафари эса маҳаллий сайёҳлар бўлиб, уларнинг сони мос равишда 1,6 ва 1,5 марта ошган.
Вилоятдаги меҳмонхоналарнинг бандлик даражаси 84 фоиздан 92 фоизгача ошган, сайёҳларнинг шаҳарда қолиш муддати эса ўртача 1,5 кунга узайган.
Мазкур даврда хорижий туристларга кўрсатилган хизматлар ҳажми бўйича 155,6 миллион АҚШ доллари миқдорида тушум қайд этилди. Бу ўтган йилга нисбатан 1,6 бараварга кўпдир.
