Ливан президенти Жозеф Аун армияга Исроил томонидан амалга оширилаётган ҳар қандай ҳужум ёки босқинга қарши жавоб беришни буюрди. Бу ҳақда Al Arabiya хабар берди.
Маълумотларга кўра, Исроил аскарлари 30 октябрь куни маҳаллий вақт билан соат 1:30 да Ливаннинг Блида шаҳридаги ҳокимлик биносига бостириб кирган. У ерда ухлаб ётган ҳокимлик ходими Иброҳим Саламеҳ ўлдирилган. Шундан сўнг, яҳудий аскарлари икки ярим соатдан сўнг ҳудуддан чиқиб кетган.
Айни пайтда, Исроил армияси Блидада тунда ҳарбий амалиёт ўтказганини тасдиқлаган. Расмий баёнотга кўра, “Ҳизбуллоҳ” инфратузилмасини йўқ қилиш операцияси давомида таҳдид аниқлангани учун ўқ узилган. Ҳозирда воқеа бўйича текширув олиб борилмоқда. Иброҳим Саламеҳ атайлаб нишонга олинганми ёки йўқми — ҳозирча номаълум.
Президент Аун бу ҳужумни Исроилнинг навбатдаги тажовузи деб атаган. Бу воқеа ўтган ҳафтада Ливанда ўтган тинчликни назорат қилиш қўмитаси йиғилишидан кўп ўтмай содир бўлган. Президент қўмитани оташкесим шартларига риоя қилишни таъминлашга чақирмоқда. Ливан ва Исроил ўртасида 2024 йил 27 ноябрь кунида ўт очишни тўхтатиш тўғрисида битим имзоланган эди.
Бош вазир Навоф Салам эса Исроилнинг мамлакатга бостириб киришини Ливан давлат суверенитетига очиқчасига тажовуз деб баҳолаган. “Ҳизбуллоҳ” ҳаракати президентнинг бу қарорини қўллаб-қувватлаб, армияга тўлиқ ёрдам беришга чақирмоқда.
Маълумки, Исроил сўнгги бир йил давомида “Ҳизбуллоҳ” билан жангларни тўхтатиш бўйича келишувга қарамай, Ливан ҳудудига зарбалар беришда давом этмоқда. Яҳудий давлати буни “Ҳизбуллоҳ”нинг жанубда ҳарбий кучини тиклашига йўл қўймаслик деб изоҳлайди. Ливан эса бу ҳаракатларни сулҳ бузилиши деб санайди.
