Жиззах вилояти Пахтакор туманида 17 апрель куни автобус йўл-транспорт ҳодисасига учраши оқибатида йўловчилар жароҳатланди. Бу ҳақда вилоят ЙҲХБ ахборот хизмати хабар берди.
Ҳодиса Тошкент—Термиз М-39 автомобиль йўлининг 957-километрида жума куни соат 06:45 да содир бўлган.
Маълум қилинишича, Нукус—Олмаота йўналишида ҳаракатланиб кетаётган йўловчи автобуси ҳайдовчиси бошқарув вақтида ҳушёрликни йўқотган. Оқибатда транспорт воситаси йўлнинг таъмирлаш ишлари олиб борилаётган қисмидаги йўлни ажратувчи бетон тўсиққа бориб урилган.
ЙТҲ оқибатида тан жароҳати олган фуқароларга бирламчи тиббий ёрдам кўрсатилган. Мазкур ҳолат юзасидан Жиззах вилояти ИИБ тергов бошқармаси томонидан терговга қадар текширув ҳаракатлари олиб борилмоқда.
