Инвестициялар, саноат ва савдо вазирлиги, Андижон вилояти ҳокимлиги ҳамда Хитойнинг Hainan Xintanbo Investment компанияси ўртасида инвестиция лойиҳаларини амалга ошириш бўйича битим имзоланди. Бу ҳақда вазирлик ахборот хизмати хабар берди.
Келишувга кўра, вилоятда тўртта йирик лойиҳа амалга оширилади. Улар қаторига Янги Андижон (Бобур) массивида кўп функцияли турар жой мажмуасини қуриш, Хонобод шаҳрида халқаро логистика маркази (“қуруқ порт”) ташкил этиш, “Сунъий кўл” туристик мажмуасини ривожлантириш ҳамда муҳандислик-коммуникация ва йўл инфратузилмасини барпо этиш киради.
Қайд этилишича, Hainan Xintanbo Investment йирик девелоперлик ва инфратузилма лойиҳаларига ихтисослашган Хитой компанияси ҳисобланади. Мазкур ҳамкорлик доирасида жалб этиладиган инвестициялар умумий ҳажми 1,4 миллиард доллардан ошади.
Лойиҳалар амалга оширилиши натижасида 2000 дан ортиқ янги иш ўринлари яратилиши кутилмоқда. Бу эса Андижон вилоятининг комплекс ривожланишига ҳамда Ўзбекистон ва Хитой ўртасидаги инвестициявий ҳамкорликни янада кенгайтиришга хизмат қилади.
