“Титаник” кемасининг омон қолган йўловчиларидан бирига тегишли бўлган қутқарув нимчаси 19 апрель куни Буюк Британияда сотувга чиқарилади. Мутахассислар ушбу аукционни “бир маротаба бериладиган имконият” деб баҳоламоқда. Бу ҳақда CNN хабар берди.
Буюк Британиянинг Henry Aldridge аnd Son аукцион уйи маълумотларига кўра, буюм 250 минг фунт стерлингдан (339 минг доллар) 350 минг фунт стерлинггача (474 минг доллар) нархда сотилиши кутилмоқда. Бу “Титаник”нинг омон қолган йўловчисига тегишли бўлган ва аукционга қўйилган ягона нимчадир.
Қаймоқранг ушбу нимча каноп матосидан тайёрланган бўлиб, у 12 та пўкак билан тўлдирилган чўнтаклардан иборат. Шунингдек, унинг елка қисмлари ва ён боғичлари бор. Нимчага унинг эгаси ва у билан бирга қутқарилган бошқа йўловчилар имзо чеккан.
Аукцион уйи директори Эндрю Олдрижнинг айтишича, бу кема тарихидаги энг рамзий буюмлардан биридир. Ҳозирги эгаси уни бошқа бир коллекциячига топшириш вақти келди деб қарор қилган. Аввалроқ ушбу экспонат кеманинг қурилган жойи Белфаст (Ирландия)даги музейда ва Теннесси штати (АҚШ)даги дунёнинг энг йирик “Титаник” музейида намойиш этилган эди.
Ушбу тадбир доирасида “Титаник” ва уни бошқарган White Star компаниясига тегишли бошқа эсдалик буюмлари ҳам сотувга қўйилади.
Лаура Франкателли ва “Титаник” тарихи
Қутқарув нимчаси кемада биринчи классда саёҳат қилган Лаура Мабел Франкателлига тегишли бўлган. Лаура таниқли модельер Люси Дафф Гордоннинг котибаси бўлиб ишлаган.
У бошлиғи ва унинг турмуш ўртоғи Козмо Дафф Гордон билан бирга Чикагога кетаётган эди. Ҳалокат вақтида уларнинг учаласи ҳам 1-сонли қутқарув қайиғига чиқишга муваффақ бўлган ва омон қолган.
Маълумот учун, RMS Titanic кемаси 1912 йил 10 апрелда ўзининг илк саёҳатига чиққан эди. Ўша пайтда у дунёдаги энг йирик йўловчи кемаси бўлган ва уни “чўкмас кема” деб ҳисоблашган. Бироқ орадан тўрт кун ўтиб, 14 апрель куни соат 23:40 да кема Шимолий Атлантика океанида айсберг билан тўқнашди.
Кемада 2 220 нафарга яқин йўловчи бўлиб, қутқарув қайиқларининг сони барчага етмаган. Кема уч соатдан камроқ вақт ичида сувга бутунлай ғарқ бўлган. Фожиада тахминан 700 киши омон қолган, қолганлар эса ҳалок бўлган.
“Кема чўкканига 114 йил бўлган бўлса-да, ундаги ҳар бир эркак, аёл ва боланинг ўз ҳикояси бор. Бугун биз ўша 2 200 дан ортиқ ҳаётий воқеаларни мана шундай буюмлар орқали тақдим этмоқдамиз”, дейди Эндрю Олдриж.
