Навоийдаги олтин конларида маъдан қазиб олиш бўйича 320 миллион долларлик лойиҳа ишга туширилади. Бу ҳақда президент Шавкат Мирзиёев 26 декабрь куни Олий Мажлис ва Ўзбекистон халқига қилган мурожаатномасида маълум қилди.
Бунда қўшимча 2 миллион тонна маъдан қайта ишланади. Шунингдек, “Мурунтов” конини ўзлаштиришнинг навбатдаги босқичи ҳамда кумуш конлари бўйича 2 миллиард 300 миллион долларлик йирик лойиҳалар амалга ошириш режа қилинган. Натижада йилига 18 миллион тонна маъданни қайта ишлаш қуввати барпо этилиб, 2030-йилгача олтин ишлаб чиқариш ҳажми 175 тоннага етказилади.
Олмалиқ комбинатида қиймати 2 миллиард 700 миллион доллар, қуввати 300 минг тонна мис катодидан иборат бўлган янги металлургия мажмуасини барпо этиш ҳам бошланади. “Самарқанд кимё” заводида эса 381 миллион доллар инвестиция ҳисобига йилига 370 минг тонна фосфорли ва 540 минг тонна мураккаб ўғитлар ишлаб чиқариш йўлга қўйилади. Шунингдек, Қашқадарёда 200 миллион долларлик кимё заводининг қурилиши бошланади ва бу орқали маиший кимё, полимер, синтетик ёқилғи учун йилига 50 минг тонна алкилбензол маҳсулоти олиш имкони яратилади.
Умумий қилиб айтганда, 2026-йилда кимё саноатида 4,5 миллиард долларлик, тоғ-кон металлургия, нефть-газ, автомобильсозлик, тўқимачилик ва қурилиш материаллари тармоқларининг ҳар бирида 3 миллиард доллардан, электротехникада 2 миллиард долларлик, фармацевтикада 800 миллион долларлик янги лойиҳалар бошланади.
Келаси йилда жами экспорт 40 миллиард долларга етказилиб, тайёр ва ярим тайёр маҳсулот улуши 55 фоиздан оширилади.
