ChatGPT фойдаланувчи 18 ёшга тўлмаганидан шубҳаланса, ундан паспорт орқали шахсини тасдиқлашни сўрай бошлади. Бу ҳақда “Gazeta.ru” хабар берди.
Текширувдан ўтмагунча тизим “фақат катталар учун” деб белгиланган мавзуларни муҳокама қилиш имкониятини чеклайди. Баъзи ҳолларда сўров ҳатто вояга етган фойдаланувчиларда ҳам кузатилмоқда. Улардан бири 30 ёшда бўлишига қарамай, тасдиқлаш талаб қилинганини айтди.
OpenAI бу функция босқичма-босқич жорий этилаётгани ва ҳозирда асосан инглиз тилида сўзлашувчи ҳудудларда синовдан ўтказилаётганини тасдиқлади. Компания баёнотига кўра, янгиликдан мақсад ёшга оид чекловларга риоя этиш ва вояга етмаганларни эҳтимолий номақбул контентдан ҳимоя қилишни кучайтиришдир.
Компаниянинг таъкидлашича, паспорт маълумотларини қайта ишлаш хавфсизлик талабларини ҳисобга олган ҳолда амалга оширилади: маълумотлар шифрланган ҳолда узатилади ва фақат ёшни тасдиқлаш учун қўлланади, ҳужжатлар очиқ тарзда сақланмайди.
Аудитория бу янгиликни турлича қабул қилди. Фойдаланувчиларнинг бир қисми ташаббусни рақамли хавфсизлик ва тартибга солиш талабларига мос мантиқий қадам сифатида қўллаб-қувватлади. Бошқалари эса механизм ортиқча ва баъзи ҳолларда нотўғри ишлашини айтиб, катталар ҳам асоссиз чекловларга дуч келаётганини танқид қилди.
OpenAI аниқлик киритишича, ҳозирги текшириш версияси синов характерига эга. Компания фойдаланувчилар фикрини таҳлил қилмоқда ва ёшни тасдиқлашнинг муқобил усулларини, шу жумладан, банк карталари ва электрон рақамли идентификаторлардан фойдаланишни кўриб чиқмоқда.
