Нидерландия ҳарбийлари 21 ноябрь кечқурун Волкел авиабазаси устида аниқланган дронларга қарата ўт очди. Бу ҳақда қироллик Мудофаа вазирлигига таяниб Deutsche Welle хабар берди.
Авиабаза қўриқчилари дронларни икки соат давомида кузатган. Мудофаа вазирлиги объект атрофида дронлар пайдо бўлишининг сабаблари ҳозирча номаълум эканини таъкидлади. Қурол қўлланилгач, дронлар учиб кетган ва уларнинг кейинги ҳаракатларини кузатишнинг имкони бўлмаган.
Ҳодиса ҳақида мамлакат жандармерияси ва полицияси хабардор қилинган, ҳозирда тергов ишлари олиб борилмоқда. Мудофаа вазирлиги хавфсизлик нуқтаи назаридан воқеанинг бошқа тафсилотларини, жумладан дронлар қандай аниқлангани ва уларга қарши қандай чоралар кўрилганини ошкор қилишдан бош тортди.
Нидерландияда шунга ўхшаш ҳолат Флиссинген порти яқинида ҳам қайд этилганди. Шунга қарамай, бу ҳодисаларнинг ҳеч бири бўйича жиноий иш қўзғатилмаган. Авиадромлар яқинида ҳар қандай дронларнинг парвоз хавфсизлигига таҳдид солгани сабаб тақиқланган.
Сўнгги ойларда Европанинг бир қатор давлатларида аэропортлар, ҳарбий базалар ва муҳим инфратузилма объектлари устида номаълум учувчисиз учиш аппаратлари парвози қайд этилмоқда. Бундай ҳолатлар Германия, Дания, Испания, Норвегия, Польша ва Литвадаги айрим ҳаво ҳудудининг ёпилишига ҳам сабаб бўлган.
