Ўзбекистон Президенти Шавкат Мирзиёев Туркия Республикасининг Денизли вилоятида йўловчи автобуси ҳалокатга учрагани оқибатида инсонлар қурбон бўлгани ва жароҳат олгани муносабати билан мамлакат етакчиси Ражаб Тойиб Эрдўғанга таъзия йўллади. Бу ҳақда Президент матбуот котиби Шерзод Асадов хабар берди.
Давлат раҳбари ҳалок бўлганларнинг оила аъзоларига чуқур ҳамдардлик изҳор этиб, жароҳатланганлар тез фурсатларда шифо топишини тилаган.
Қайд этилишича, бахтсиз ҳодиса Денизлининг Сарайкой шаҳрида юз берган. Измирдан Анталияга кетаётгани айтилган автобусда 38 йўловчи ва уч нафар ходим бўлган. Автобус тўсиқларга урилиши ортидан ёниб кетган. Воқеа жойига ўт ўчириш гуруҳлари, тез тиббий ёрдам хизмати ва полиция вакиллари етиб борган.
Ёнғин ўчирилгач, воқеа жойида ҳайдовчи ва етти нафар йўловчи жон бергани аниқланган. Ҳалок бўлганлар қаторида тўққиз ойлик чақалоқ ҳам борлиги маълум қилинган. Жароҳатланганлар эса тез ёрдам машиналарида шаҳардаги касалхоналарга олиб кетилган.
