Жанубий Кореянинг Чинжу шаҳрида 20 апрель куни юк машинаси намойишчиларни уриб кетди. Оқибатда бир киши ҳалок бўлди, яна икки киши жароҳат олди. Бу ҳақда Yonhap News Agency хабар берди.
Полиция маълумотларига кўра, оғирлиги 2,5 тонна бўлган юк машинаси маҳаллий вақт билан соат 10:32 ларда логистика маркази яқинида одамларни уриб юборган. Намойишчилар юк машинасининг ҳудудни тарк этишига тўсқинлик қилмоқчи бўлганида тўқнашув юз берган.
Полициянинг фикрича, тўқнашув 40 ёшли юк машинаси ҳайдовчиси йўлини тўсиб қўйган намойишчилардан қочишга уринганида содир бўлган. У оғир тан жароҳати етказганликда айбланиб, воқеа жойида қўлга олинди. Ҳуқуқ-тартибот идоралари гумонланувчининг қасддан қилинганини текширмоқда.
Таъкидланишича, 50 ёшли намойишчилардан бирининг юраги тўхтаб қолган. У шифохонага етказилган, аммо у ерда вафот этган. Яна икки нафар жабрланувчи ўртача ва енгил тан жароҳати олган, ҳозирда уларнинг аҳволи барқарор.
Намойишни юк ташувчи ишчилар касаба уюшмаси ташкил қилган. Улар CU дўконлар тармоғи оператори бўлган BGF Retail Cо. компанияси билан қўшма музокаралар ўтказишни талаб қилаётган эди.
Ушбу фожиадан бир неча соат ўтиб, вазият янада кескинлашган. Соат 13:33 да касаба уюшмасига тегишли транспорт воситаси намойиш жойи яқинидаги полиция тўсиғига (баррикадага) бориб урилган. Оқибатда 20 ёшлардаги полиция ходими енгил тан жароҳати олган.
Полиция ходимлари тўсиққа урилган машина ҳайдовчиси ва унинг ичидаги йўловчини қўлга олди. Ҳозирда тергов ҳаракатлари олиб борилмоқда. Воқеадан сўнг намойиш иштирокчилари ва полиция ўртасида қарама-қаршилик юзага келган.
