Россия Эрондан 2,7 миллиард долларга баллистик ва зенит ракеталари сотиб олган бўлиши мумкин. Бу ҳақда Bloomberg агентлиги ўзининг хавфсизлик идораларидаги манбаларига таяниб маълум қилди. Маълум бўлишича, бу борадаги ҳамкорлик рус армияси Украинага кенг кўламли бостириб киришидан олдинроқ бошланган. Аниқроқ айтганда, томонлар қурол-яроғ етказиб бериш бўйича шартномаларни 2021 йилнинг октябрь ойидаёқ имзолаган.
Келишувлар доирасида Россия иттифоқчисидан юзлаб қисқа масофали Fat-360 баллистик ракеталари, яқин масофага мўлжалланган қарийб 500 та баллистик ракета, шунингдек, ҳаво ҳужумидан мудофаа тизимлари учун 200 га яқин зенит ракеталар сотиб олган. Бундан ташқари Эрон Россияга миллионлаб ўқ-дорилар ва артиллерия снарядлари етказиб берган.
Шу билан бирга, томонлар 2023 йил бошида дронлар бўйича 1,75 миллиард долларлик шартнома имзолаган. Унинг доирасида рус муҳандислари Shahed-136 камикадзе дронлари ҳамда уларни ишлаб чиқариш технологиясини қўлга киритган. Натижада Россия Эрон дронларини “Геран-2” номи билан ишлаб чиқара бошлаган.
Bloomberg манбасига кўра, Москва 2021 йил охиридан буён Эрон қуролларини сотиб олиш учун 4 миллиард доллардан ортиқ маблағ сарфлаган. Аммо бу ҳаммаси эмас, Россия иттифоқчисидан қурол-яроғларнинг янги партиясини қабул қилиб олиши кутилмоқда.
Россия—Эрон муносабатлари
Москва ҳамда Теҳрон Украинага қарши кенг кўламли уруш бошланган 2022 йил февралидан сўнг муносабатларини қалинлаштирди. Москва Ғарб билан қарама-қаршилик фонида Эрон билан яқинлашиб, халқаро санкциялар таъсирини юмшатишга ҳаракат қилмоқда. Томонлар ўртасидаги алоқалар ҳарбий ҳамкорликни ҳам ўз ичига олади.
Бундан ташқари, иттифоқчилар Каспий денгизи орқали Ҳиндистонга савдо йўлаги очишни, шунингдек, санкцияларни четлаб ўтиш учун молиявий муносабатларни кучайтиришни режа қилган. Россия ҳамда Эрон 2025 йил январида имзолаган стратегик ҳамкорлик тўғрисидаги битим қатор йўналишларни қамраб олган.
