АҚШ ва Япония Тинч океанида тахминан 6 километр чуқурликдан ноёб ер металларини биргаликда қазиб олишни режалаштирмоқда. Бу ҳақда Bloomberg хабар берди.
Маълум қилинишича, қазиб олиш ишлари Япониянинг Минамиторишима ороли яқинида амалга оширилиши кўзда тутилган. Токио университети ҳисоб-китобларига кўра, ушбу ҳудуддаги ноёб ер металлари захираси 16 миллион тоннадан ортиқ бўлиши мумкин.
Океан тубида диспрозий, тербий ва иттрий каби юқори технологиялар саноати учун муҳим металлар мавжуд. Улар кучли магнитлар, яримўтказгичлар ва бошқа замонавий қурилмалар ишлаб чиқаришда қўлланилади.
АҚШ ва Япония лойиҳани ноёб ер металлари бозорида етакчи ўринни эгаллаб турган Хитойга қарамликни камайтириш имконияти сифатида кўрмоқда.
Япония ҳудудда дастлабки синов ишларини ўтказган. 2027 йил февраль ойида металларни қазиб олиш, қайта ишлаш ва эритиш технологияларини синовдан ўтказиш режалаштирилган. 2028 йилга келиб эса лойиҳани тижорий миқёсда амалга ошириш имкониятлари баҳоланиши кутилмоқда.
Бироқ асосий муаммо коннинг ўта чуқур жойлашганидир. Мутахассислар ҳисоб-китобига кўра, океан тубидан металл қазиб олиш харажатлари Хитойдаги қуруқлик конларига нисбатан тахминан уч баравар қимматга тушиши мумкин.
Шу билан бирга, чуқур денгизда саноат миқёсида қазиб олишнинг экологик оқибатлари бўйича хавотирлар ҳам мавжуд. Халқаро денгиз тубини бошқариш ташкилоти доирасида бундай фаолиятни етарли илмий маълумотлар тўплангунга қадар кечиктириш тарафдори бўлган давлатлар сони 46 тага етган.
