Ўзбекистон Президенти Шавкат Мирзиёев топшириғи билан Қурбон ҳайити арафасида ҳамда Афғонистондаги сел-сув тошқинларидан жабр кўрган аҳолига кўмак сифатида навбатдаги инсонпарварлик ёрдами Балх вилоятига етказилди. Бу ҳақда Сурхондарё вилояти ҳокимлиги ахборот хизмати хабар берди.
Қарийб 200 тонна озиқ-овқат маҳсулотлари ортилган ёрдам юклари Ҳайратон шаҳридаги “Астрас” компанияси ҳудудида топширилган. Маросимда Ўзбекистон Президентининг Афғонистон бўйича махсус вакили Исматилла Эргашев, Сурхондарё вилояти ҳокими Улуғбек Қосимов, Балх вилояти губернатори ўринбосари Нурулҳоди Абуидрис ҳамда икки давлат расмийлари иштирок этди.
Инсонпарварлик ёрдами таркибидан ун, гуруч, шакар, макарон ва қандолат маҳсулотлари, ўсимлик ёғи, нўхат ҳамда тез тайёрланадиган таомлар ўрин олган.
Афғонистон расмийлари Ўзбекистон Президенти ва халқига кўрсатилаётган инсонпарварлик ёрдами учун миннатдорлик билдириб, Қурбон ҳайити муносабати билан самимий табрикларини йўллаган.
