Самарқандда 7 киши вафот этган газ портлаши иши бўйича газ идораси раҳбар ва ходимлари 7 йилга қамалди. Жабрланувчилар газ ҳиди чиқаётганини айтиб, газ идорасига бир неча маротаба мурожаат қилган. Бироқ ташкилот ходимлари бунга эътибор қаратишмагани маълум бўлди.
Саманқанд шаҳрида бир оиланинг 7 аъзоси ҳалок (ФВВ дастлабки маълумотда вафот этганлар 6 нафар эканини маълум қилганди) бўлган портлаш бўйича жиноят иши жиноят ишлари бўйича Самарқанд шаҳри судида кўриб чиқилди. Бу ҳақда «Замон» дастурида маълум қилинди.
Хабарга кўра, 2024 йил сентябр-октябр ойларида Спитамен шоҳкўчаси ва 160-уй атрофидаги хонадонларни газлаштириш ишлари лойиҳа ва техник шартларсиз амалга оширилган.
Ёлланма усталар ёрдамида ноқонуний тарзда автомобил йўли остига газ қувури ётқизилган. Лаборатория хулосаси ва хавфсизлик қопламасиз ер остига туширилган қувур ноқонуний тармоққа уланганлиги аниқланган. Қувурда 7 та тешик пайдо бўлиб, табиий газ марказий оқова қудуғига сизиб чиққан. Оқибатда портлаш содир бўлган.
Портлаш содир бўлгунга қадар хонадон эгалари газ ҳидидан безовта бўлиб, газ идорасига 11 маротаба мурожаат қилган. Бироқ ташкилот масъуллари бунга эътиборсиз қарашган.
Судланувчи бўлган «Ҳудудгаз Самарқанд» газ таъминоти филиали Самарқанд шаҳри бўлими раҳбари ва 3 нафар ходими Жиноят кодексининг 116-моддаси 4-қисми «а, б» бандларида (Касб юзасидан ўз вазифаларини лозим даражада бажармаслик одамлар ўлимига ва бошқа оғир оқибатларга сабаб бўлса) назарда тутилган жиноятни содир қилганликда айбли деб топилди.
Уларга 3 йил давлат иштирокидаги корхоналар ва ташкилотларда мансабдорлик ҳамда моддий жавобгарлик лавозимларида ишлаш ҳуқуқидан маҳрум қилган ҳолда 7 йил муддатга озодликдан маҳрум қилиш жазоси тайинланди.
Шунингдек, портлашдан зарар кўрган фуқаролар фойдасига газ таъминоти корхонасидан қарийб 6 млрд сўм ундириш белгиланган.
