Эроннинг Муваққат раҳбарият кенгаши агар Яқин Шарқ мамлакатлари ҳудудидан ҳужумлар уюштирилмаса, уларга қарши янги зарбалар бермаслик ҳақида қарор қабул қилди. Бу ҳақда Эрон Президенти Масъуд Пезешкиён маълум қилди.
У ҳужумлардан жабр кўрган қўшни давлатлардан узр сўраган.
“Қўшни давлатлардан узр сўрайман. Кеча Муваққат раҳбарият кенгаши агар уларнинг ҳудудидан Эронга қарши ҳужум бўлмаса, қўшни давлатларга бошқа ҳужумлар қилинмаслиги ва ракеталар учирилмаслиги ҳақида қарор қабул қилди”, дейди у.
Пезешкиён Эроннинг қўшниларига нисбатан тажовузкор нияти йўқлигини таъкидлаган. Шу билан бирга, Теҳрон душманлари унинг сўзсиз таслим бўлиши ҳақидаги орзуларини “ўзлари билан гўрга олиб кетишлари” кераклигини қўшимча қилган.
Президентнинг сўзларига кўра, Эрон халқаро ҳуқуққа, инсонпарварлик нормалари ва қарши томон тез-тез тилга оладиган тамойилларга амал қилади.
