Фавқулодда вазиятлар вазирлиги қутқарувчилари Тошкент вилоятининг Оҳангарон туманидаги тоғларида йўқолиб қолган 4 ёшли болани топди. Бу ҳақда вазирликнинг Telegram-каналида хабар берилди.
Ҳодиса кеча, 13 апрель куни Оҳангарон тумани ҳудудидаги тоғларда содир бўлган. Олти кишидан иборат оила таркибида 4 ёшли бола ҳам бўлган, улар дам олиш учун йўлга чиққан. Сайр вақтида соат тахминан 17:00 ларда улар тоғ чўққисидаги қорларни кўриш мақсадида юқорига кўтарилган. Айнан шу жойда катталар болани унутиб қолдириб, дам олишни давом эттириш учун пастга тушиб кетган. Боланинг йўқлиги тахминан 40 дақиқадан сўнг маълум бўлган.
Шундан сўнг боланинг яқинлари зудлик билан ФВВнинг навбатчилик қисмига хабар берган. Йўқолган болани қидириш ишларига Тошкент вилояти ФВББ қидирув-қутқарув гуруҳлари, шунингдек “Қамчиқ” махсус қутқарув бошқармаси ходимлари дарҳол жалб этилган. Қидирув-қутқарув ишлари 6,5 соатдан ортиқ давом этган.
Бугун, 14 апрель куни тунги соат 00:20 да 4 ёшли бола Олмалиқ махсус қидирув-қутқарув отряди қутқарувчилари томонидан тирик ҳолда топилган. Қутқарувчиларнинг сўзларига кўра, бола ота-онаси уни унутиб қолдирган жойдан тахминан 3 километр узоқликдан топилган. Топилган вақтда бола тиззасигача қор ичида жим ҳолда турган бўлган.
Қайд этилишича, бола яқинларига соғ-саломат топширилган. Ҳозирда у ўз уйида, аҳволи яхши.
