2026 йилнинг дастлабки икки ойида Ўзбекистонда гиёҳвандлик воситалари, психотроп ва кучли таъсир қилувчи моддалар ноқонуний муомаласи билан боғлиқ 2 533 та жиноят ҳамда 313 та маъмурий ҳуқуқбузарлик аниқланди. Бу ҳақда Наркотиклар ва ўқотар қуролларни назорат қилиш агентлиги хабар берди.
Таъкидланишича, аниқланган жиноятларнинг 54 фоизи Тошкент шаҳри, Фарғона ва Тошкент вилоятларига тўғри келган. Хусусан, Тошкент шаҳрида 729 та, Фарғона вилоятида 346 та, Тошкент вилоятида эса 289 та ҳолат қайд этилган.
Статистикага кўра, аниқланган наркожиноятларнинг энг катта қисми — 51 фоизи ёки 1 280 таси Жиноят кодексининг 273-моддаси билан боғлиқ. Улар гиёҳвандлик воситалари, уларнинг аналоглари ёки психотроп моддаларни ўтказиш мақсадида қонунга хилоф равишда тайёрлаш, олиш, сақлаш ёки ноқонуний тарқатиш ҳолатларидан иборат.
Шунингдек, йил бошидан буён ўтказилган тезкор-профилактик тадбирлар давомида 8 та ноқонуний нарколаборатория фош этилиб, уларнинг фаолияти тўхтатилган. Натижада жами 375 килограмм наркотик, психотроп ва кучли таъсир қилувчи моддалар ноқонуний истеъмолга чиқиб кетишининг олди олинган.
Мусодара қилинган гиёҳвандлик воситаларининг асосий қисмини гашиш ва марихуана ташкил этган. Жумладан, гашиш 42 фоиз ёки 146 килограммни, марихуана эса 33 фоиз ёки 113 килограммни ташкил қилган.
Агентлик маълумотларига кўра, гиёҳвандликка қарши тарғибот ва профилактика ишлари ҳам кенг миқёсда олиб борилган. Икки ой давомида маҳаллаларда 300,3 минг, таълим муассасаларида 43,2 минг, жамоат жойлари, бозор ва дўконларда 17,1 минг, етказиб берувчилар ва такси ҳайдовчилари ўртасида 6,5 минг, дорихоналарда 3,7 минг, масжидларда 2,9 минг, давлат ва хусусий ташкилотларда 8,6 минг маротаба тарғибот тадбирлари ўтказилган.
Умуман олганда, мамлакат бўйлаб 382,3 минг маротаба профилактик тадбирлар ташкил этилиб, уларга 6,1 миллион нафар аҳоли, жумладан 4,3 миллион ёш жалб қилинган. Бундан ташқари, наркотикларнинг зарарли оқибатлари ҳақида оммавий ахборот воситалари ва интернет тармоқларида жами 29,4 минг материал ёритилган.
Телевидение ва радиода 1,4 мингдан ортиқ кўрсатув ҳамда эшиттиришлар эфирга узатилган, веб-сайт ва ижтимоий тармоқларда 27,8 мингга яқин, газета ва журналларда эса 260 дан ортиқ материал чоп этилган. Шунингдек, аҳолига 1,4 миллиондан ортиқ буклет ва флайерлар тарқатилган.
