Сўровнома иштирокчиларининг 40 фоизи норматив-ҳуқуқий ҳужжатлардан, тўйларга қўйилган чекловлардан хабари йўқ. Бу ҳақда Маънавият ва маърифат маркази раҳбари Отабек Ҳасанов айтиб ўтди.
Отабек Ҳасановнинг айтишича, кўпчилик аҳоли тўйларни тартибга солувчи Қонунчилик палатаси ва Сенатнинг қўшма қароридан ҳамда ҳукумат қароридан хабардор эмас.
Хотин-қизлар қўмитаси ва биз ўтказган сўровномада респондентларнинг 40 фоизи норматив-ҳуқуқий ҳужжатлар, яъни чекловлардан хабари йўқлиги маълум бўлди. 61 фоиз респондентлар тўйни содда ва оддийроқ ўтказишни ёқлаб чиққан. Сўровнома иштирокчиларининг 26 фоизи эса тўйларни келишув асосида ёки ихчамлаштириш бўйича таклифлар берди, деди мулозим.
Унинг алоҳида таъкидлашича, Ижтимоий тадқиқотлар институти ўтказган сўровномада иштирок этган ёшларнинг 45—50 фоизи тўй ўтказиш учун қарз олишларини билдирган.
Маълумот учун, Вазирлар Маҳкамасининг “Тўйлар, оилавий тантаналар, маърака ва маросимлар ўтказилишини тартибга солиш тизимини янада такомиллаштириш тўғрисида”ги қарори билан низом тасдиқланган.
Низомда оилавий тадбирларда 200 нафаргача, мазкур тадбирлар муносабати билан ош бериш маросимида 250 нафаргача киши қатнашиши мумкинлиги белгиланганди. Қўшалоқ тўй-ҳашамларда ҳам 250 нафаргача, у билан боғлиқ ош бериш маросимида эса 300 нафаргача киши қатнашиши мумкинлиги белгиланган.
Миллий анъаналарга ёт, одоб-ахлоқ қоидаларига зид бўлган турли шоуларни, ортиқча вақт ва харажат талаб қиладиган оилавий тадбирлардан олдинги, тадбир давомидаги ва ундан кейинги қўшимча расм-русумларни (“куёв навкари”, “чорлар”, “ота кўрди”, “сеп ёйди”, “қуда чақирди”, “куёв чақирди”, “келин чақирди”, “тоғора юбориш” ва ҳоказоларни) ўтказишга йўл қўйилмайди. Дафн этиш ва мотам маросимлари билан боғлиқ ортиқча тадбирларни (“етти”, “пайшанбалик”, “якшанбалик”, “йигирма”, “қирқ”, “ҳайит”, “йил оши”, “пул тарқатиш”, “мато улашиш” ва ҳоказоларни) ўтказиш ман этилган.
