Киберхавфсизлик маркази фуқаролардан келиб тушган мурожаатлар асосида Pioneer Global Media LTD номи остида фаолият юритаётган фирибгарлар гуруҳини аниқлади.
Қайд этилишича, мазкур шахслар онлайн ишга таклиф қилиш баҳонасида гўёки мунтазам даромад топиш мумкинлигини ваъда қилиб, ҳар бир фуқародан энг камида 3 миллион 500 минг сўм миқдорида тўловларни алдов йўли билан ундириб олган.
Ҳозирда республиканинг бир нечта вилоятларида Pioneer Global Media LTD (PGM) номи остида Telegram мессенжерида махфий гуруҳлар ташкил этилган. Ушбу гуруҳларга фақат администраторлар томонидан тасдиқланган фойдаланувчиларгина қўшилиши мумкин.
Махфий гуруҳга қўшилган фуқароларга камида 3 миллион 500 минг сўм тўловни амалга ошириш эвазига онлайн ишга қабул қилиниши ва маълум топшириқларни бажарганидан сўнг ҳар ҳафта хизмат ҳақи тўлаб берилиши айтилган. Шу йўл билан фуқаролар фирибгарлик схемасига жалб этилган.
Тўлов қилиб сохта ишга олинганларга танишларига таклиф ҳаволасини юбориш имконияти берилган. Агар таклиф ҳаволаси орқали бошқа фуқаролар тўловни амалга оширса, ушбу маблағнинг 10 фоизи ҳаволани юборган шахсга мукофот сифатида берилиши ваъда қилинган.
“Мазкур ҳолатлар молиявий пирамида ва фирибгарлик аломатларига эга бўлиб, фуқаролардан бундай таклифларга ишонмаслик, шубҳали гуруҳлар ва шахсларга пул ўтказмаслик қатъий тавсия этилади”, дейилади хабарда.
