Испания Мудофаа вазирлиги 15 март куни Яқин Шарқда хавфсизлик ҳолати ёмонлашгани ва операцияларни хавфсиз давом эттириш имконияти йўқлиги сабабли мамлакат махсус кучларини Ироқдан вақтинча кўчирганини эълон қилди. Бу ҳақда Euronews хабар берди.
Вазирлик баёнотига кўра, Махсус операциялар бўйича тезкор гуруҳ (SОTG) хавфсизлик билан боғлиқ вазият Ироқ кучлари билан ўқув машғулотларини давом эттиришга тўсқинлик қилгани сабабли хавфсиз ҳудудларга кўчирилган. Расмийлар барча шахсий таркиб аъзолари соғ-саломат эканини тасдиқлади.
Испания ИШИД гуруҳига қарши халқаро коалиция таркибида Ироқда, тахминан, 300 нафар ҳарбий хизматчисини сақлаб турарди. SОТG гуруҳи Бағдодда ва курдлар назоратидаги ҳудудлардаги базаларда Ироқ антитеррор бўлинмаларига сабоқ беради. Мудофаа вазирлиги қўшинлар айнан қаерга кўчирилганига аниқлик киритмади.
Ушбу қарор 12 март куни Эрбил яқинидаги Франция ҳарбий базасига уюштирилган ва талафотларга сабаб бўлган дрон ҳужумидансўнг қабул қилинди. Эрон томонидан ишлаб чиқарилган Shahed дрони Эрбилдан 40 километр жануби-ғарбда жойлашган Мала Қара объектига зарба берган. Ҳужум оқибатида 42 ёшли катта прапоршик Арно Фрион ҳалок бўлган, яна бир неча француз аскарлари жароҳатланган.
Франция президенти Эммануэл Макрон ушбу ҳужумни қабул қилиб бўлмас деб атади ва француз қўшинлари минтақада фақат терроризмга қарши кураш учун жойлаштирилганини эслатиб ўтди.
“Эрондаги уруш бундай ҳужумларни оқлай олмайди”, деди Макрон.
Эрбил халқаро аэропорти яқинидаги Сингара лагерига 16 март куни учувчисиз аппарат зарба берганидан сўнг Италия ҳам ўз ходимларини ушбу базадан эвакуация қилган эди. Италиялик ҳарбийлар орасида жароҳатланганлар йўқ.
Испания 2015 йилдан бери АҚШ бошчилигидаги Inherent Resolve (“Азалий қатъият”) операцияси доирасида Ироқда доимий иштирок этиб келади. Махсус операциялар бўйича тезкор гуруҳ таркиби ҳар олти ойда ротация қилинади. Унинг сафига қуйидаги тузилмалар операторлари киради:
- қуруқликдаги қўшинларнинг махсус операциялар қўмондонлиги;
- ҳарбий-денгиз кучларининг махсус денгиз уруши кучлари;
- ҳарбий-ҳаво кучларининг парашют-муҳандислик полки.
