Ижтимоий тармоқларда Россия Давлат думаси депутати ва собиқ боксчи Николай Валуев Марказий Осиё давлатларига “қамчи” қўллаш вақти келганини айтган видео тарқалди. Бу сунъий интеллектда тайёрланган бўлиши мумкин. Унга жавобан 2007-йилда Валуевни рингда мағлуб этган ўзбекистонлик боксчи Руслан Чагаев “керак бўлса яна битта жангга тайёрлигини” айтди.
Валуевнинг таъкидлашича, Украинадаги “махсус операциялар” собиқ совет республикаларида ҳам олиб борилиши керак.
“Бизни ҳали бир нечта махсус операциялар кутмоқда. Буюк файласуф Дугин ҳақ. Биз 30 йил давомида посцовет республикаларига “ширинликлар” улашдик, лекин бу ёрдам бермади. Энди қамчи керак бўлади. Шунинг учун ёшларни тайёрламоқдамиз. Зумерларга спорт залига боришни ва эркакларга хос спорт турлари билан шуғулланишни маслаҳат бераман. Улар учун ҳам қаҳрамонлар даври келади, ва тез орада”, деди у.
Собиқ спортчининг ушбу фикрларига ўзбекистонлик боксчи Руслан Чагаев жавоб қайтарди. У Валуев билан жангга киришиш таклифини берди.
“Менимча бу сунъий интеллект томонидан тайёрланган. Агар ундай бўлмаса, Валуевни калласини жойига қўйиш керак бўлса, мен тайёрман. Жангдан сўнг у Марказий Осиё ҳақида бундай ‘бемаза’ гаплар гапирмайди”, деди у.
Чагаев нутқи давомида Ўзбекистон ва Россия ўртасидаги муносабатлар ҳозирда яхши эканини, Валуевга ўхшаганлар эса буни бузишга ҳаракат қилаётганини айтди.
Бундан олдин “Рус дунёси” ғоясининг асосий мафкурачиси ҳамда Кремльга яқин кўриладиган файласуф собиқ СССР мустамлакалари, жумладан Марказий Осиё давлатлари суверенитетини инкор қилганди. Унинг фикрича, Россия бу мамлакатларни “назоратга олиши керак”.
“Ёки улар бизнинг ягона иттифоқимиз таркибига киради, ёки АҚШ ва Европа Иттифоқи учун плацдармга айланади”, деган эди Дугин.
Аввалроқ эса, россиялик телебошловчи Владимир Соловёв Арманистон ҳамда Марказий Осиё Россия учун Сурия ёки Венесуэладан кўра анча муҳим эканини таъкидлаб, уларни йўқотиш Москва учун “улкан муаммо” бўлишини айтганди. Журналист бу ҳудудларда ҳам Украинада бўлгани каби “махсус ҳарбий операция” ўтказишга чақирган.
“Ўз мақсад ва вазифаларимизни жуда аниқ шакллантиришимиз керак. Очиқ айтишимиз лозим: ўйинлар тугади. Халқаро ҳуқуқ ҳам, халқаро тартиб ҳам биз учун аҳамияциз. Агар миллий хавфсизлигимиз учун Украина ҳудудида махсус ҳарбий операцияни бошлаш зарур бўлган бўлса, худди шу мулоҳазалардан келиб чиқиб, нима учун биз ўз таъсир зонамиздаги бошқа ҳудудларда ҳам махсус ҳарбий операцияларни бошлай олмаслигимиз керак?”, деган эди у.
Соловёв, бундан ташқари, Марказий Осиёни “бизнинг Осиё” деб атаб, минтақада юзага келиши мумкин бўлган муаммолар Россия миллий хавфсизлигига жиддий хавф туғдиришини иддао қилган. Журналист ўз чиқишида Россия раҳбариятини халқаро ҳуқуқ ва халқаро тартиб масалаларини эътиборсиз қолдиришга чақириб, “ўйин тугагани”ни айтган.
