Андижон вилоятида икки нафар хотин-қизни фоҳишалик билан шуғулланиш учун Туркияга жўнатмоқчи бўлган шахслар қўлга олинди. Бу ҳақда Андижон ИИБ ахборот хизмати хабар қилди.
Маълум қилинишича, “Хавфсиз ва соғлом юрт” тезкор-профилактик тадбири доирасида Андижон вилояти ИИБ тезкор қидирув хизмати ходимлари томонидан одам савдоси билан боғлиқ жиноят фош этилган.
1998 ва 1995 йилларда туғилган икки нафар аёл 2002 ва 1994 йилларда туғилган қизларни алдаш йўли билан ўзларига оғдириб, уларнинг йўл ҳамда бошқа харажатларини кўтаришни ваъда қилган. Уларнинг мақсади қизларни Туркияга олиб бориб, фоҳишаликка жалб этиш бўлган.
Гумонланувчилар жабрланувчиларни Тошкент халқаро аэропорти орқали Туркияга олиб чиқиб кетишни режалаштирган, бироқ улар Андижон вилоятининг Шаҳрихон тумани ҳудудида тезкор ходимлар томонидан ушланган.
Мазкур ҳолат юзасидан Жиноят кодексининг 135-моддаси (одам савдоси) 2-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
