Жаҳон бозорларида қимматбаҳо металлар кетма-кет ҳафталик ўсишни намойиш этмоқда. Айниқса, кумуш нархи рекорд даражага кўтарилиб, инвесторлар эътиборини яна бир бор ушбу металлга қаратди. Бу ҳақда “Маrket Screener” хабар берди.
Қайд этилишича, ҳафта охирига келиб кумуш нархи унцияси учун 67,45 долларга етиб, тарихий рекордни янгилади. Spot кумуш 2,6 фоизга қимматлаб, 67,14 доллар даражасида баҳоланди. Натижада ҳафталик ўсиш 8,4 фоизни ташкил этди. Мутахассислар буни кучли инвестиция талаби ва бозор таклифининг чеклангани билан изоҳламоқда.
Шу билан бирга, олтин нархи ҳам ўсиш суръатини сақлаб қолди. Spot олтин 0,4 фоизга кўтарилиб, унцияси учун 4 347,07 долларни ташкил этди. Ҳафталик ҳисобда эса олтиннинг даромади 1,1 фоизга етди. АҚШ олтин фьючерслари ҳам 0,5 фоизга ўсиб, 4 387,3 долларга баҳоланди.
“US Global Investors” компаниясининг бош трейдери Майкл Матоусекнинг сўзларига кўра, одатда олтин ва кумуш ўзаро чамбарчас боғлиқ бўлса-да, сўнгги икки ой ичида бозорда етакчиликни айнан кумуш қўлга олган. Бундай ҳолатда инвесторлар қисқа муддатли истиқболда олтинни яна диққат марказига олиб чиқиши мумкин.
Йил бошидан буён кумуш нархи 132 фоизга ошди, бу эса олтиннинг 65 фоизлик ўсишидан деярли икки баробар юқори. “Blue Line Futures” компанияси бош бозор стратеги Филипп Стреибл буни ETF оқимларининг фаоллиги ва чакана инвесторларнинг спекулятив ҳаракатлари билан боғламоқда.
Макроиқтисодий кўрсаткичлар ҳам қимматбаҳо металлар учун қулай муҳит яратмоқда. Хусусан, АҚШда ноябрь ойида истеъмол нархлари индекси йиллик ҳисобда 2,7 фоизга ошди, бу эса иқтисодчиларнинг 3,1 фоизлик прогнозидан паст бўлди. Бундан ташқари, ишсизлик даражаси 4,6 фоизга кўтарилиб, 2021 йил сентябридан буён энг юқори даражага чиқди.
Мутахассисларнинг фикрича, инфляциянинг секинлашуви ва меҳнат бозоридаги заифлашув Федерал Резервни пул-кредит сиёсатини юмшатишга ундовчи асосий омиллар бўлиб қолмоқда. LSEG маълумотларига кўра, трейдерлар келаси йилда камида икки марта 25 базавий пунктлик фоиз ставкаси пасайтирилишини кутмоқда.
Бошқа қимматбаҳо металлар ҳам ижобий динамикани кўрсатди. Платина нархи 18 декабрь куни 17 йиллик энг юқори даражага яқинлашиб, 19 декабрь куни 3,1 фоизга ўсди ва 1 975,51 долларга етди. Палладий эса қарийб уч йиллик энг юқори кўрсаткичга яқинлашиб, 0,8 фоизга кўтарилди ва 1 709,75 доллар даражасида савдоланди. Ҳар иккала металл ҳам ҳафтани ўсиш билан якунлади.
Умуман олганда, глобал иқтисодий ноаниқлик, Марказий банклар сиёсатига оид кутилаётган қарорлар ва инвестиция талаби қимматбаҳо металларни 2025 йил якунида молиявий бозорлардаги энг қиммат активлардан бирига айлантирмоқда.
