Саудия Арабистони Ички ишлар вазирлиги Макка шаҳридаги Масжидул Ҳарамнинг юқори қаватидан бир эркак ўзини пастга ташлаганини маълум қилди. Бу Khaleej Times хабар берди.
Масжидул Ҳарам хавфсизлигини таъминлаш махсус кучларининг хабар беришича, ушбу шахс ўз жонига қасд қилиш мақсадида бинонинг юқори қаватидан сакраган. Воқеа жойида бўлган хавфсизлик ходими унинг ерга зарба билан тушишининг олдини олишга уринган ва натижада ўзи ҳам жароҳат олган. Ҳозирда ҳар иккала шахс ҳам шифохонада ва уларга зарурий тиббий ёрдам кўрсатилмоқда. Ҳолат бўйича барча тегишли ҳуқуқий ва расмий жараёнлар якунланган.
Масжидул Ҳарам бош имоми, шайх Абдур Раҳмон ас Судайс мазкур ҳолат юзасидан баёнот берди. У зиёратчиларни муқаддас даргоҳнинг қоидаларига риоя қилишга ва белгиланган кўрсатмаларга амал қилишга чақирди.
“Зиёратчилар ушбу жойнинг муқаддаслигини эъзозлаши, исломий одобларга риоя этиши ҳамда ўзларини фақат ибодат ва тоатга бағишлаши лозим”, деди шайх Судайс.
Бош имом, шунингдек, Ислом шариатининг асосий мақсадларидан бири инсон ҳаётини асраш эканини эслатиб ўтди. У ўз нутқида Аллоҳ таолонинг “Ўз қўлларингиз билан ўзларингизни ҳалокатга ташламанг” деган оятини мисол қилиб келтирди.
