Англиянинг “Ливерпуль” клуби Абдуқодир Ҳусановнинг ўйинларини узоқ вақтдан бери кузатиб келмоқда ва футболчини харид қилишга тайёр. Бу ҳақда жамоага оид инсайд маълумотларни сиздирувчи “Анфиэлд Papers” нашри хабар берди.
Қайд этилишича, агар “Манчестер Сити” Ҳусанов трансфери учун 47 миллион фунт стерлингдан юқори нарх талаб қилмаса, “Ливерпуль” ушбу трансфер бўйича музокараларга киришишга тайёр.
2026 йил ёзда Мерсисайд клуби ҳимойчиси Ибраҳима Конате жамоани тарк этиши эҳтимоли мавжуд экани сабабли ўзбекистонлик ҳимоячи унинг ўрнини тўлдириши кутилмоқда.
Конатенинг мерсисайдликлар билан шартномаси 2026-йилнинг ёзида якунланади. Клуб футболчига бошқа топ жамоалар томонидан катта қизиқиш бўлишини кутмоқда.
Аввалроқ Конатега Мадриднинг “Реал” клуби ҳам жиддий қизиқиш билдираётгани ҳақида хабарлар тарқалган эди. “Қироллик клуби” футболчини текинга қўлга киритишдан манфаатдор.
Transfermarkt портали Конатенинг қийматини 50 миллион евро этиб белгилаган.
Айни пайтда ўзбекистонлик футболчининг трансфер қиймати 35 миллион еврога баҳоланмоқда. Ҳусанов ҳозирда Англия Премьер лигасида тўп тепаётган энг қиммат 96-футболчи ҳисобланади. “Манчестер Сити” таркибида эса ушбу кўрсаткич бўйича 16-ўринни эгаллаб турибди.
