Покистон пойтахти Исломобод шаҳрида 11 ноябрь куни суд биноси олдида портлаш юз берди. Ҳодиса оқибатида камида 12 киши ҳалок бўлди, бир неча киши жароҳат олди. Бу ҳақда полицияга таяниб, Al Jazeera хабар берди.
“Биз бу қандай турдаги портлаш эканини текширяпмиз. Ҳозирча аниқ эмас. Суд-тиббиёт экспертизаси гуруҳимиздан ҳисобот олганимиздан сўнг батафсилроқ маълумот беришимиз мумкин”, деди полиция вакили.
Портлаш суд биноси рўпарасида тўхтаб турган автомобилда содир бўлган.
“Машинамни тўхтатиб, мажмуага кирганимда… дарвозада кучли овоз эшитдим. Бу бутунлай тартибсизлик эди, адвокатлар ва одамлар мажмуа ичида у ёқдан бу ёққа югуришарди. Мен дарвоза олдида иккита жасад ётганини ва бир нечта машина ёнаётганини кўрдим”, деди адвокат Рустам Малик.
Geo News канали манбаларига таяниб, портлаш оқибатида 21 киши жароҳатлангани ҳақида хабар берди.
- Бир кун олдин Ҳиндистонда портлаш юз берганди
Деҳли шаҳрида 10 октябрь куни кучли портлаш содир бўлган эди. Ҳодиса оқибатида 12 киши ҳалок бўлган. Тунда Қизил қалъа яқинида турган машина портлатилган.
Кучли портлаш бир нечта автомобилни ёндириб юборган, яқин атрофдаги биноларнинг ойналари синиб кетган. Деҳли полицияси шаҳарда тревога эълон қилган. Воқеа жойига еттита ўт ўчирувчи машина юборилган, ҳудуд ўраб олинган. Воқеа жойидаги видеоларда бир нечта машина ёниб тургани, одамлар орасида ваҳима чиққани кўринади.
