Геологлар Канаданинг Онтарио провинциясидаги Кидд-Крик конидан ер пўстлоғида тахминан икки миллиард йил давомида изоляцияда қолган сувни топди. Бу ҳақда Торонто университети тадқиқотига таяниб, “Space Daily” нашри хабар берди.
Қайд этилишича, сув намунаси тахминан уч километр чуқурликдан юқорига олиб чиқилган. Таҳлиллар шуни кўрсатдики, ушбу сув узоқ вақт давомида қадимги тоғ жинслари қаърида “қамалиб қолган” ва атмосфера билан умуман алоқада бўлмаган. Олимларга унинг ёшини аниқлашда суюқликда эриган ацил газлар – гелий, неон, аргон ва ксенон таркиби ёрдам берган. Ушбу элементлар ёпиқ тизимда тўпланиб борган, бу эса сувнинг қанча вақт давомида изоляцияда бўлганини баҳолаш имконини берган.
Тадқиқотчиларнинг сўзларига кўра, суюқлик ҳаддан ташқари шўр – ундаги тузлар концентрацияси денгиз сувига қараганда тахминан ўн баравар юқори. Шунингдек, у яққол сезиладиган аччиқ таъм ва ўткир олтингугурт ҳидига эга.
Олимларда алоҳида қизиқиш уйғотган жиҳат шундаки, ушбу қадимги сув таркибида микроорганизмлар мавжуд бўлган. Олимларнинг фикрича, микроорганизмлар қуёш нури иштирокисиз, сув ва атрофдаги минераллар ўртасидаги кимёвий реакциялар туфайли топ-қоронғиликда яшаб қолишга муваффақ бўлган.
Тадқиқотчилар бу топилмани Ернинг қадимий тарихига оид ноёб “капсулали” парча деб атамоқда. У сайёранинг чуқурликдаги экотизимларида ҳаёт қандай ривожланганини ва микроорганизмлар қандай шароитда миллиардлаб йиллар давомида яшай олишини яхшироқ тушунишга ёрдам бериши мумкин.
