Қирғизистон президенти Садир Жапаров фан, олий таълим ва инновациялар вазири Бахтияр Орозовни ишдан олди.
Амалдор давлат хизматчиларининг этика талабларига риоя қилмагани учун ишдан бўшатилган. Президент 15 декабрь куни вазирни ишдан бўшатиш тўғрисидаги фармонни имзолаган. Тегишли қарор сабабларининг бошқа тафсилотлари келтирилмаган.
Бахтиёр Орозов 15 декабрга ўтар кечаси Чуй вилоятида ЙҲХБ ходимлари томонидан спиртли ичимлик истеъмол қилган ҳолда автомобиль бошқарганликда гумонланиб қўлга олинган. Тиббий кўрик натижасида унинг организмида алкоголь борлиги тасдиқланган.
Бахтиёр Орозовнинг ўзи пиво ичганини айтган. Қирғизистон Ички ишлар вазирлиги Йўл ҳаракати хавфсизлигини таъминлаш бош бошқармаси барча тафсилотларни тез орада маълум қилишини билдирган.
Орозов 2025-йилнинг май ойида фан, олий таълим ва инновациялар вазири этиб тайинланган эди. Бунгача у Қирғизистон таълим ва фан вазирининг биринчи ўринбосари ва адлия вазири ўринбосари лавозимларида ишлаган.
