Андижон шаҳридаги кўп қаватли уйда 11 февраль, чоршанба куни газ-ҳаво аралашмаси чақнаши содир бўлди. Бу ҳақда ФВБ ахборот хизмати хабар берди.
Қайд этилишича, чақнаш соат 23:55 да “Нодирабегим” МФЙ ҳудудида жойлашган кўп қаватли уй хонадонларидан бирида вужудга келган. Хабарга асосан ФВБ раҳбарияти ҳамда қутқарув бўлинмалари зудлик билан воқеа жойига етиб борган.
Дастлабки маълумотларга кўра, ҳодиса оқибатида ёнғин келиб чиқмаган ва кўп қаватли уйнинг бошқа хонадонларига зарар етмаган. Қутқарувчилар томонидан ҳудуд кўздан кечирилиб, хавфсизлик чораларини таъминлаш бўйича зарур тадбирлар амалга оширилган.
Вазият қисқа фурсатда назоратга олинган. Чақнаш оқибатида икки нафар фуқаро тан жароҳати олган. Жароҳатланганларнинг аҳволи юзасидан қўшимча маълумот берилмаган.
