Рус ҳарбийлари реактив двигательга эга янги камикадзе дрондан фойдалана бошлади. Бу ҳақда Украина ҳарбий разведкаси маълум қилди. Манбага кўра, гап Геран-5 номли учувчисиз учиш аппаратлари ҳақида бормоқда.
Маълумотларга кўра, у “Геран” оиласининг аввалги моделларига нисбатан каттароқ ва тезроқ бўлиб, тахминан 1000 км масофага парвоз қила олади. Унинг тахминан 6 метрни, қанотлари кенглиги эса 5 метрни ташкил қилади. Дрон 90 кг оғирликдаги жанговар каллак ташийди. Бу энергетика объектлари, ўқ-дори омборлари ва ҳарбий қисмлар каби стратегик нишонларга жиддий хавф туғдиради.
Украина ҳарбий разведкасига кўра, мазкур дрон рус муҳандислари томонидан мустақил ишлаб чиқилмаган. Аэродинамик тузилиш ва техник ечимлар жиҳатидан у Эроннинг “Каррар” дронига жуда ўхшайди. “Геран” оиласининг аввалги моделлари ҳам Shahed’ларга асослангани боис аксар таҳлилчилар мазкур тахминни қўллаб-қувватлаяпти.
Бироқ айрим кузатувчилар Геран-5 маҳаллий “Дан-М” реактив дронининг такомиллаштирилган версияси бўлиши мумкинлиги ҳақидаги версияни илгари сурган. Дан-М дастлаб рус ҳарбийлари томонидан ҳаво мудофаа машғулотлари учун “нишон” сифатида фойдаланилган. Аммо кейинчалик такомиллаштирилиб, зарба бериш воситасига айлантирилган.
Украина ҳарбий разведкасига кўра, россияликлар Геран-5 дронларини Су-25 самолётларидан учириш имкониятини ҳам кўриб чиқяпти. Бу унинг парвоз масофасини янада ошириши мумкин.
