Telegram мессенжери орқали содир этилган йирик фирибгарлик иши тафсилотлари маълум бўлди. Жазо муддатини ўтаётган маҳкум сохта аккаунтлар, виртуал карталар ва ишончли кўринишга эга эълонлар орқали фуқароларнинг ишончига кириб, жами 4 миллиард 800 миллион сўм миқдорида моддий зарар етказган.
Маълум қилинишича, 1999 йилда Қашқадарё вилоятининг Ғузор туманида туғилган Қиличбой Аббосов Telegram’даги “Ёлғиз бўри” номли аккаунт орқали фаолият юритган. У машина савдосига оид гуруҳларда ўзига тегишли бўлмаган қиммат автомобиллар — хусусан, BYD ва Prado русумли машиналарни жойлаб, уларни бозор нархидан анча арзон таклиф қилган. Шу йўл билан фуқаролардан “бошланғич тўлов” сифатида минглаб доллар миқдорида пул олган ва шундан сўнг алоқа воситаларини ўчириб, ғойиб бўлган.
Маҳкумнинг айтишича, у ишонч уйғотиш учун автомобилларнинг йили, техник ҳолати, пробеги ва суратларини интернет манбаларидан йиғиб, видеороликлар тайёрлаган. Пул маблағлари эса унинг номига расмийлаштирилмаган виртуал карталар орқали қабул қилинган. Ушбу карталар Face ID технологияси ёрдамида бошқа шахсларга тегишли паспорт маълумотлари асосида очилган бўлиб, тушган маблағлар кейинчалик турли тўлов тизимлари ва танишлар карталари орқали нақдлаштирилган.
Суд ҳукмига кўра, Қиличбой Аббосов Жиноят кодексининг 168-моддаси учинчи қисми “б” ва “г” бандлари билан айбли деб топилиб, 5 йил-у 1 ой муддатга озодликдан маҳрум этилган. У жиноятга моддий манфаат ва қизиқиш сабаб бўлганини, дастлаб осон йўл билан пул топиш истаги кейинчалик назоратдан чиққанини билдирган. Маҳкум ҳозирда қилган ишларидан пушаймонлигини, жабрланувчилардан кечирим сўрашини ва ёшларни бу йўлдан йироқ бўлишга чақирган.
Мутасаддилар ушбу ҳолат интернет орқали таклиф қилинаётган “тез бойиш” ва “фойдали сармоя” ваъдаларига ишонмаслик, молиявий операцияларни фақат текширилган манбалар орқали амалга ошириш зарурлигини яна бир бор эслатмоқда. Фуқаролар ижтимоий тармоқларда ҳушёр бўлишга ва бегоналарга ўз маблағларини ишониб топширмасликка чақирилди.
