Тошкентнинг Яшнобод туманида икки автомобиль тўқнашуви оқибатида бир киши ҳалок бўлди.
Пойтахт ЙҲХБ матбуот хизматининг хабар қилишича, 20 декабрь куни соат 03:45 ларда Махтумқули кўчасида 2004-йилда туғилган ҳайдовчи Ж.Й. Lacettiʼни бошқариб кетаётиб, рул бошқарувини йўқотган ва йўлнинг қарама-қарши томонига ўтиб кетиб 1977-йилда туғилган С.А. бошқарувидаги Nexia-3 билан тўқнашган.
ЙТҲ оқибатида Nexia-3 йўловчиси олган тан жароҳатлари натижасида вафот этган. Lacetti ва Nexia-3 ҳайдовчиларига шифокорлар томонидан биринчи тиббий ёрдам кўрсатилган.
Ижтимоий тармоқларда ушбу тўқнашув оқибатлари акс этган видеолар тарқалди. Унда Nexia-3 аянчли ҳолга келиб қолгани кўринган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши) билан жиноят иши қўзғатилган. Бунда айбдор шахс муайян ҳуқуқдан маҳрум қилиб, 7 йилгача озодликдан маҳрум қилиш билан жазоланиши мумкин. Айни пайтда тергов давом этмоқда.
