Россияда аккредитациядан ўтган Япониянинг Hokkaido Shimbun газетаси журналисти Имайи Юки қўлга олинди. У “Россия ҳудудида разведка фаолиятини олиб борганлик”да айбланмоқда. Бу ҳақда Россия Ташқи ишлар вазирлиги хабар берди.
Япониялик журналист Россия Федерал хавфсизлик хизмати (ФХХ) томонидан Сахалин вилоятида қўлга олинган. Москванинг Лефортово суди уни камида икки ой муддатга ҳибсда сақлаш ҳақида қарор чиқарган. Маълумотларга кўра, журналист Россиядан учиб кетишидан олдин қўлга олиниб, Москвага олиб кетилган.
У Лефортово тергов изоляторида сақланиши кутилмоқда. Жосусликда айбдор деб топилса, унга 10 йилдан 20 йилгача озодликдан маҳрум қилиш жазоси тайинланиши мумкин.
Россияда япониялик журналистга қандай айбловлар қўйилмоқда?
ФХХ маълумотларига кўра, қўлга олинган журналист “мамлакат мудофаа қобилиятига оид маълумотларни Россия хавфсизлигига қарши фойдаланиш учун миллий разведка топшириғига кўра топшириш мақсадида тўплаш ва сақлашни амалга оширган”. Хусусан, у Курил оролларида Украинага қарши урушга сафарбар қилинган ҳарбий ва кўнгиллилар сони ҳақида маълумот тўплагани айтилмоқда.
“Бу Токионинг Россиядаги ва хорижий журналист мақомига эга мухбирларини давлатимиз хавфсизлигига путур етказиш мақсадида маълумот тўплаш учун ишлатишга уринаётган биринчи ҳолати эмас”, дея таъкидлади Россия Ташқи ишлар вазирлиги.
“Осторожно, новости” Telegram канали Имайи Юки камида 2014 йилдан бери Россияга келиб тургани ва Санкт Петербург давлат университетида таҳсил олганини ёзди.
“Унинг 12 йил аввалги постларида Россия театрлари, музейлари, консерваториялари, шу жумладан, балет билан боғлиқ кўплаб фотосуратлар мавжуд”, дейилади хабарда.
Hokkaido Shimbun газетасида журналист 2026 йил сентябрь ойида Хабаровскда очилган, “милитаристик Япония устидан қозонилган ғалаба ва Иккинчи жаҳон урушининг якунланишига бағишланган” ёдгорлик ҳақида ёзган. Шунингдек, у сентябрь ойида бўлиб ўтган Давлат думаси сайловлари ҳамда Россия ва Шимолий Корея ўртасидаги алоқалар мустаҳкамланишини ёритган.
Имайининг сўнгги мақоласи 5 октябрь куни чоп этилган. Унда журналист Жанубий Сахалинскдан репортаж тайёрлаб, Россиянинг ушбу ҳудудида Шимолий Корея фуқаролари борлиги ҳақида ҳикоя қилган.
