Кеча, 5 ноябрь куни АШнинг Миссисипи штати Язу шаҳридаги CF Industries аммиак ишлаб чиқариш заводида катта портлаш содир бўлди. Бу ҳақда “Mississippi Free Press” хабар берди.
Нашр маълумотига кўра, ҳодиса содир бўлган завод водород ва азот маҳсулотлари, жумладан аммиак ва ўғитлар ишлаб чиқаради. Портлаш оқибатида ҳалок бўлганлар ёки жароҳатланганлар ҳақида ҳозирча маълумот йўқ. CF Industries компанияси “ҳодиса вақтида объект ичида бўлган барча ходимлар ва пудратчилар хавфсиз тарзда эвакуация қилинганини” маълум қилган.
Шу билан бирга, штат ҳокимияти аҳолига ҳозирча кўчага чиқмасликни тавсия қилмоқда, чунки заводдан заҳарли моддалар сизиб чиқиши ҳали бартараф этилмаган. Ҳодиса жойига яқин яшовчиларга эса эвакуация қилиш буюрилган. Америка Қизил Хочи вақтинчалик ёрдамга муҳтож ёки уйдан чиқа олмайдиган аҳоли учун иқлим назорати билан таъминланган қабул марказини очган.
Миссисипи губернатори Тейт Ривзнинг сўзларига кўра, штатнинг Фавқулодда вазиятлар агентлиги, Атроф-муҳит сифати департаменти ва Жамоат хавфсизлиги департаменти маҳаллий фавқулодда ҳолат раҳбарларига ёрдам кўрсатмоқда.
Қизил Хочнинг маълум қилишича, ҳаво сифати ва хавфли моддаларнинг мавжудлигини кузатувчи гуруҳлар “вазиятни фаол равишда мониторинг қилиб бормоқда”.
Ташкилот марказга келаётган аҳолига ўзлари билан зарур нарсаларни – рецепт бўйича дори воситалари ва тиббий буюмлар, муҳим ҳужжатлар (шахсни тасдиқловчи гувоҳнома, суғурта ҳужжатлари), шахсий гигиена воситалари, мобил телефон зарядлагичлари ҳамда болалар учун зарур буюмларни олиб келишни қатъий тавсия қилган.
