Эрон яқин икки-уч кун ичида ядровий музокаралар бўйича АҚШга таклиф лойиҳасини тайёрлайди. Бу ҳақда мамлакат Ташқи ишлар вазири Аббос Ароқчи маълум қилган.
Мулозимнинг айтишича, сўнгги музокараларда Вашингтон Эрон учун “ноль даражадаги уран бойитиш” талабини қўймаган, Теҳрон эса ушбу жараённи тўхтатишни таклиф қилмаган. Ароқчи томонлар ҳозир ядровий дастурнинг, жумладан, бойитиш жараёнининг тинч мақсадларда эканини ва шундайлигича қолишини кафолатлаш механизмларини муҳокама қилаётганини билдирган.
Вазирнинг таъкидлашича, бунинг эвазига санкциялар бўйича муайян чоралар кўрилиши эҳтимоли бор. У тафсилотларни очиқламаган бўлсада, дипломатик келишув “қисқа муддатда” амалга ошиши мумкинлигини айтган.
Оқ уй ҳозирча Ароқчининг баёнотларига расмий муносабат билдирмаган. Томонлар ўртасида навбатдаги музокаралар бир ҳафта ичида ўтказилиши кутилмоқда.
