Тошкент, Фарғона ва Андижон вилоятида жами 25 минг дозани ташкил қилган 12,5 килограмм гиёҳвандлик воситалари аниқланди. Бу ҳақда Ички ишлар вазирлиги хабар берди.
Жумладан, жорий йилнинг 29 октябрь куни ўтказилган тезкор тадбирлар натижасида Фарғона вилоятида яшовчи икки нафар уюшган наркогуруҳ аъзолари Фарғона вилояти Бувайда туманида тўхтатилиб текширилганда, уларда оғирлиги 10 килограмм бўлган “гашиш” гиёҳвандлик воситалари борлиги аниқланиб, қўлга олинди. Тезкор суриштирув ҳаракатлари натижасида улар бу фаолият билан бир йилдан буён шуғулланиб келаётгани, ушбу воситаларни таниши айтган манзилга асосан олгани, топшириққа кўра бу воситаларни Фарғона, Наманган, Андижон вилоятига тарқатишини билдирган. Ўтказилган тезкор тадбир натижасида жами 20 минг дозани ташкил қилувчи гиёҳвандлик воситалари аниқланиб, расмийлаштириб олинди.
Андижон вилоятида яшовчи икки нафар шахс вилоятнинг Бўстон туманида тўхтатилиб текширилганда, оғирлиги 1 килограмм “гашиш” гиёҳвандлик моддаси борлиги аниқланиб, тезкор гуруҳ томонидан ушланди. Уюшган жиноий гуруҳ аъзолари ушбу моддаларни Андижон вилоятида тарқатиш билан шуғулланиб келиши, улардан олинган моддалар жами 2000 та дозага тенг экани аниқланди.
Тезкор гуруҳларнинг навбатдаги ўтказган тадбири натижасида Тошкент шаҳрида “гашиш”, марихуана, мефедрон синтетик гиёҳвандлик воситаларини “закладка” усулида тарқатаётган талабалар қўлга олинди. 1999 йилда туғилган, Тошкент шаҳрида яшовчи фуқаронинг яшаш хонадони кўздан кечирилганда, 700 грамм марихуана ва 600 грамм “гашиш” гиёҳвандлик воситалари ҳамда 100 грамм мефедрон синтетик гиёҳвандлик воситалари борлиги аниқланиб, ашёвий далиллар тариқасида ҳужжатлаштириб олинган. Суриштирув давомида ушбу фуқаро Telegram’даги интернет наркодўконида кладмен лавозимида ишлаб келиб, синтетик гиёҳвандлик воситаларини “закладка” усулида тарқатиш билан шуғулланаётгани аниқланган.
Шундан сўнг тезкор қидирув ҳаракатлари давом эттирилиб, тадбир давомида бир нечта шу каби ҳолатлар аниқланди. Қашқадарёдан бўлган 2004 йилда туғилган 4-босқич талаба 2005 йилда туғилган сурхондарёлик 3-босқич талаба билан биргаликда Яккасарой туманида жойлашган кўп қаватли уйнинг олдидан гиёҳвандлик воситаларини олган вақтида ушланди. Чўнтакларидан жами 82 дона “изалента” бўлакларига ўралган 82 грамм мефедрон, “гашиш”, марихуана гиёҳвандлик воситалари топилди. Тезкор тадбирлар натижасида жами 1,5 килограмга яқин бўлган гиёҳвандлик воситалари тарқалиши олди олинди. Ҳолат юзасидан тезкор қидирув тадбирлари давом эттирилмоқда.
