Исроил армиясининг собиқ прокурори Йифат Томер-Ерушалми ҳисбга олинди. У исроиллик аскарлар фаластинлик маҳбусни қийноққа солгани акс этган видеони тарқатганди. Бу ҳақда BBC хабар берди.
Томер-Ерушалми ўтган ҳафта Исроил армиясининг бош ҳарбий адвокати лавозимидан истеъфога чиқди. У зўравонлик акс этган видеонинг тарқалиши учун жавобгарликни ўз зиммасига олган. 2 ноябрь куни Томер-Ерушалми бедарак йўқолган. Полиция Тель-Авив шимолидаги пляжда уни соатлаб қидирган ва топиб, ҳибсга олган.
- Ҳарбий прокурор қандай видеони тарқатган эди?
2024 йил август ойида Исроил янгиликлар каналида видео эфирга узатилди. Видеода Сде Тейман ҳарбий базасидаги аскарлар ҳибсдаги фаластинликни калтаклаб, ўткир нарса санчгани тасвирланган. Қўлга олинган фаластинлик оғир жароҳатлар билан даволанган.
Ҳолат юзасидан 5 нафар захирадаги ҳарбийга “оғирлаштирилган зўравонлик ва маҳбусга оғир тан жароҳати етказганлик” айби қўйилган. Улар ўзларига қўйилган айбловларни рад этган ва суд жараёнини бекор қилишни талаб қилган.
Генерал Томер-Ерушалми тергов давомида таътилга чиқарилган. 31 октябрь куни мудофаа вазири Исроил Кац прокурор ўз лавозимига қайтмаслигини айтди. Кўп ўтмай, генерал Томер-Ерушалми истеъфога чиққан.
Истеъфо хатида у медиага тарқатилган ҳар қандай материал учун тўлиқ жавобгарликни ўз зиммасига олганини таъкидлаган.
“Мен армиянинг ҳуқуқ-тартибот идораларига қарши йўналтирилган ёлғон пропагандага қарши курашиш учун медиага материал беришни ма’қулладим. Маҳбусга нисбатан зўравонлик ҳаракатлари ҳақида асосли шубҳа пайдо бўлганда, буни текшириш бизнинг бурчимиздир”, деган у.
Томер-Ерушалми истеъфога чиққанидан сўнг Кац унинг хатти-ҳаракатларини қаттиқ қоралаган.
“Кимки Исроил армияси қўшинларига қарши қонли туҳматлар тарқаца, у армия формасида бўлишга нолойиқ”, дея даъво қилган яҳудий мудофаа вазири.
Бош вазир Биньямин Нетаньяху ҳам унинг сўзларини такрорлаб, Сде Теймандаги воқеа “эҳтимол, Исроил давлати ташкил топганидан бери бошдан кечирган энг оғир жамоатчилик билан алоқалар ҳужуми” бўлганини айтди.
Бир неча соат ўтгач, Исроил оммавий ахборот воситаларида Томер-Ерушалми бедарак йўқолгани ҳақида биринчи хабарлар пайдо бўлди. Катта қидирув ишлари бошланди. Бир неча соат ўтгач, у Герцлия қирғоқ ҳудудида “соғ-саломат ва яхши ҳолатда” топилди.
3 ноябрь куни полиция вакили тергов доирасида “маълумотлар сизиб чиқиши ва бошқа оғир жиноий ҳуқуқбузарликлар”да гумон қилиниб, икки киши ҳибсга олинганини эълон қилди. Исроил оммавий ахборот воситаларининг хабар беришича, улар Томер-Ерушалми ва собиқ бош ҳарбий прокурор, полковник Матан Соломош бўлган.
