Ижтимоий тармоқларда икки киши кар ҳайдовчини ҳақорат қилгани акс этган видео тарқалиб, турли муҳокамаларга сабаб бўлди. Мазкур ҳолат юзасидан Самарқанд вилояти Йўл ҳаракати хавфсизлиги бошқармаси муносабат билдирди.
Қайд этилишича, аслида руль бошқарувида кар ҳайдовчи бўлмаган. Уч нафар “шоввоз” видеотасвирга олиб, уни ижтимоий тармоқларга жойлаган. Бу ҳолат тармоқ фойдаланувчиларининг ўринли эътирозига сабаб бўлган. Олиб борилган суриштирув ишлари натижасида ҳуқуқбузарлар топилиб, уларнинг иши Жиноят ишлари бўйича Самарқанд шаҳар судида кўриб чиқилган. Ушбу ҳолат юзасидан автомашина бошқарган ҳайдовчига нисбатан 8 сутка, ичида бўлган 2 нафар йўловчига нисбатан 10 суткадан маъмурий қамоқ жазоси тайинланган.
Шунингдек, олиб борилган суриштирув ишлари давомида ушбу автоуловни бошқарган ҳайдовчининг ҳали ҳайдовчилик гувоҳномасига эга эмаслиги аниқланиб, унга нисбатан Маъмурий жавобгарлик тўғрисидаги кодекснинг 135-моддаси (Йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) 2-қисмига асосан маъмурий баённома расмийлаштирилиб, автоулов вақтинчалик жарима майдончасига олиб борилган.
