Наманган туманида Telegram мессенжери орқали вояга етмаганлар тасвирланган порнографик материалларни тарқатиб келган шахс қўлга олинди. Бу ҳақда вилоят Ички ишлар бошқармаси хабар берди.
Маълум қилинишича, республика бўйлаб ўтказилаётган “Хавфсиз ва соғлом юрт” кенг қамровли тезкор-профилактик ойлиги доирасида ўтказилган тезкор тадбирлар давомида Наманган туманида яшовчи фуқаро Telegram мессенжерида “канал 10 000” номли аккаунт орқали гуруҳ ташкил қилгани аниқланган. Ушбу гуруҳ орқали у вояга етмаганлар тасвирланган порнографик материалларни намойиш қилиш ва тарқатиш билан шуғулланиб келган.
Тезкор-қидирув тадбирлари давомида ушбу шахс гуруҳ аъзоларидан ҳар биридан 8 минг сўмдан 10 минг сўмгача пул қабул қилиб, уларни Агробанк пластик картаси орқали ўтказиб олгани аниқланган. Қайд этилишича, у жами 120 нафар шахсга тақиқланган видео материалларни тарқатган.
Мазкур ноқонуний фаолият орқали шахс моддий даромад орттириш билан бирга жамият маънавий муҳитига, айниқса ёшлар тарбияси ва уларнинг ҳуқуқларига жиддий зарар етказган. Мутасаддилар вояга етмаганлар иштирокидаги порнографик материалларни тайёрлаш, сақлаш, намойиш этиш ёки тарқатиш амалдаги қонунчиликка кўра жиноий жавобгарликка сабаб бўлишини эслатиб ўтган.
Ҳолат юзасидан Наманган тумани ички ишлар бўлими ҳузуридаги тергов бўлинмаси томонидан фуқаро устидан Жиноят кодексининг 130-моддаси 3-қисми билан жиноят иши қўзғатилган. Ҳозирда мазкур иш бўйича дастлабки тергов ҳаракатлари олиб борилмоқда.
Ҳуқуқни муҳофаза қилувчи органлар фуқаролардан ижтимоий тармоқлар ва мессенжерлар орқали тарқатилаётган ноқонуний ҳамда тақиқланган материалларга алоқадор бўлмасликни, бундай ҳолатлар аниқланса зудлик билан тегишли органларга мурожаат қилишни сўради.
