Шимолий Корея Ракета қурилиши бош бошқармаси кеча, 24 декабрь куни катта баландлик ва узоқ масофага мўлжалланган янги зенит ракеталарининг синов учиришини амалга оширди. Бу ҳақда Корея Марказий ахборот агентлиги хабар берди.
Синов жараёнини КХДР етакчиси Ким Чен Ин шахсан кузатган ва синовлар муваффақиятли ўтгани муносабати билан ишлаб чиқувчиларни табриклаган.
Учириш Корея Шарқий денгизи акваториясида бўлиб ўтган ва янги ҳаво ҳужумидан мудофаа тизимининг тактик-техник хусусиятларини баҳолашга қаратилган илк синов бўлгани қайд этилган.
Ахборот агентлиги маълумотига кўра, ракеталар тахминан 200 километр масофадаги шартли ҳаво нишонларини муваффақиятли уриб туширган. Синовлар мамлакат ҳаво мудофааси тизимини ривожлантириш бўйича режалаштирилган ишлар доирасида ўтказилган.
Агентликнинг таъкидлашича, Пхеньян ядровий жанговар тайёргарликни сақлаш ва кучайтиришни миллий хавфсизликнинг асосий вазифаларидан бири, деб ҳисоблайди ва буни ўзининг “асосий мажбурияти” сифатида кўради.
