Президент Дональд Трамп АҚШда барча “учинчи дунё мамлакатлари” миграцияси тўхтатилганини маълум қилди. Бу ҳақда BBC хабар берди.
Трамп ўзининг Truth Social платформасида пост қолдириб, муҳожирларни Америкада ижтимоий дисфунксия (тартибсизлик) келтириб чиқаришда айблаган ва АҚШ учун “соф даромад” бўлмаган ҳар қандай шахсни мамлакатдан чиқариб юборишга ваъда берган.
“АҚШ тизимига тўлиқ тикланиш имконини бериш учун барча учинчи дунё мамлакатларидан миграцияни тўхтатаман”, деб ёзган президент.
Трампнинг бу қарори Вашингтонда содир бўлган отишма ортидан эълон қилинмоқда. Ҳодисада Миллий гвардия ходими ҳалок бўлган, айбдор эса афғонистонлик фуқаро экани хабар қилинган. АҚШ президент янги эълон юзасидан қўшимча маълумотлар бермаган ва бу тақиқ қайси давлатларга амал қилишини очиқламаган. Сабаби, бундай режа юридик муаммоларга дуч келиши ва БМТ агентликлари томонидан қаршиликка сабаб бўлиши мумкин.
Трамп ўзининг иккинчи президентлик даврида мамлакатдаги муҳожирларга нисбатан ўз позициясини кескинлаштирмоқда. Жумладан, у АҚШдаги ноқонуний иммигрантларни оммавий депортация қилиш кампаниясига старт берган. 26 ноябрь кунги отишмадан кейин президент АҚШ Фуқаролик ва иммиграция хизматларидан 19 та давлатдан Қўшма Штатларга кўчиб келган шахсларга берилган грин карталарни қайта кўриб чиқишини сўраган.
Мазкур агентлик ҳам учинчи дунё мамлакатлари дейилганда кимлар назарда тутилаётганини очиқламаган. Аммо агентлик Оқ уйнинг июнь ойидаги баёнотига ишора қилган. Ушбу баёнотда Афғонистон, Куба, Гаити, Эрон, Сомали ва Венесуэла каби давлатлар тилга олинган эди.
“Учинчи дунё мамлакатлари”
“Учинчи дунё” атамаси илгари камбағал, ривожланаётган давлатларни ифодалаш учун ишлатилган. Оқ уй ва иммиграция агентлиги Трампнинг режасига доир қўшимча маълумотларни ҳозирча ошкор этмаяпти. Президент 2025 йил бошида Афғонистон ва яна 11 та давлат, асосан, Африка ва Осиё мамлакатлари фуқароларига нисбатан саёҳат тақиқини жорий қилган эди. Биринчи президентлик даврида эса у бир қатор мусулмонлар кўп бўлган мамлакатларга нисбатан яна бир саёҳат тақиқини қўллаган эди.
