Ливан Президенти Жозеф Аун Баабдадаги президент саройида FIFA президенти Жанни Инфантинони қабул қилиб, унга Ливан фуқаролигини бериш тўғрисида қарор қабул қилди. Бу ҳақда “Тhе National” нашри хабар берди.
Ливан футбол ассоциацияси бу ҳаракатни мамлакатдаги футболни қўллаб-қувватлаш ва ривожлантиришдаги ролини таъкидловчи “рамзий” қарор сифатида баҳолади. Жанни Инфантино кейинчалик Ливаннинг LBCI телерадиокомпаниясига берган интервьюсида бу қарорни мамнуният билан қабул қилганини билдирди.
“Менда ҳали паспорт йўқ, лекин тез орада бўлади. Ўзимни жуда яхши ҳис қиляпман, фахрланяпман ва бахтиёрман. Мен кўп йиллардан бери Ливан билан алоқадаман, шунинг учун бу расмийлаштирилгани яхши бўлди”, дейди FIFA раҳбари.
Инфантино, шунингдек, Ливанга керак бўлган ягона нарса бутун мамлакат фахрланадиган замонавий футбол стадиони эканини таъкидлади.
Маълумот учун, Инфантино 2016 йилдан бери FIFA президенти сифатида ишлаб келади. FIFA раҳбари Швейцария ва Италия фуқаролигига ҳам эга.
