Тошкентнинг Чилонзор, Юнусобод, Янгиҳаёт, Бектемир ва бошқа ҳудудларида гиёҳвандлик воситаларининг ноқонуний айланишига қарши тезкор тадбирлар ўтказилди.
Тадбирлар давомида нуфузли ОТМнинг 3-босқич талабаси интернетдаги наркодўконда “кладмен” бўлиб ишлагани аниқланган. Янгиҳаёт туманидаги постда унинг бошқарувидаги Onix автомобили тўхтатилиб текширилганда, салонига яширилган 500 грамм Альфа-ПВП синтетик гиёҳвандлик моддаси топилган.
Давом этган тезкор-қидирув тадбирлари натижасида трансмиллий жиноий уюшманинг Ўзбекистондаги 7 нафар омборчиси, уларга ишлаган 6 нафар “закладчик”i ҳамда уюшма етакчиларидан бири қўлга олинган. Шунингдек, уюшма етакчиларидан яна бири хорижий давлат ҳудудида қўлга олингани маълум қилинди.
Умумий ҳисобда 14 нафар шахс қўлга олиниб, улардан 71 433 та бир марталик дозага тенг 2 килограмм 500 грамм Альфа-ПВП синтетик гиёҳвандлик моддаси процессуал тартибда расмийлаштириб олинди. Ҳолат юзасидан Жиноят кодексининг 273-моддаси 6-қисми билан жиноят иши қўзғатилиб, гумонланувчиларга нисбатан қамоқ эҳтиёт чораси қўлланган.
