Ўзбекистонда содир этилган бир неча жиноятлар учун қидирувда бўлган “Гряз” лақабли жиноий уюшма етакчиси Туркияда ушланди. Бу ҳақда 14 декабрь куни Ички ишлар вазирлиги хабар қилди.
Маълум қилинишича, Ўзбекистон ИИВ Тезкор-қидирув департаменти Жамоат хавфсизлиги хизматининг Уюшган жиноятчиликка қарши курашиш бошқармаси, ДХХ ҳамда Ўзбекистоннинг Истанбул шаҳридаги Бош консулхонаси билан ҳамкорликда олиб борилган тезкор-қидирув тадбирлари натижасида, Ўзбекистон ҳудудида жиноий уюшма етакчиси сифатида бир қатор жиноятларни содир этишда айбланиб, қидирувда бўлган ва Туркияда терговдан яшириниб юрган “Гряз” лақабли 1993 йилда туғилган Ё.М., 5 декабрь куни Ўзбекистонга қайтарилиб, тергов органларига топширилган.
Ушбу шахс Жиноят кодексининг 112-моддаси (ўлдириш ёки зўрлик ишлатиш билан қўрқитиш) 2-қисми, 164-моддаси (босқинчилик) 4-қисми, 165-моддаси (товламачилик) 3-қисми, 173-моддаси (мулкни қасддан нобуд қилиш ёки унга зарар етказиш) 2-қисми ва 242-моддаси (жиноий уюшма ташкил этиш) 1-қисми билан айбланиб, 2023 йилда Яшнобод тумани ИИО ФМБ томонидан қидирувга эълон қилинган эди.
