Кеча, 21 декабрь куни Туркия Бош ассамблеясида 2026 йил бюджети ва 2024 йил якуний ҳисоб тўғрисидаги қонунлар бўйича овоз бериш жараёнида депутатлар ўртасида муштлашув юз берди. Бу ҳақда “Haberler” нашри хабар берди.
Жанжал Республика Халқ партияси фракцияси раиси ўринбосари Мурат Эмирнинг Адолат ва тараққиёт партияси депутати Мустафо Варанкка ташланиши билан бошланган. Можаро қисқа вақт ичида оммавий муштлашувга айланиб, унда ҳар икки партияга мансуб бошқа депутатлар ҳам иштирок этган.
Ҳамкасбларнинг аралашуви натижасида жанжал тўхтатилган. Ҳодисага қарамай, 2026 йил Марказий ҳукумат бюджети тўғрисидаги қонун лойиҳаси ҳамда 2024 йил якуний ҳисобот тўғрисидаги қонун қабул қилинган. Овоз беришда 320 нафар депутат “ёқлаб”, 249 нафари “қарши” овоз берган.
Бу Туркия парламентида содир бўлган илк муштлашув эмас. Хусусан, 2022 йилда ҳам бюджет муҳокамалари вақтида депутатлар ўртасида жанжал ва муштлашув юз берган. Ўшанда муштлашув тахминан 10 дақиқа давом этган.
