Қирғизистондаги сиёсатчи ва видеоблогер, “кўмир қироли” номи билан танилган Нурлан Мотуев 57 ёшида вафот этди. Бу ҳақда унинг акаси Нурдин Мотуев хабар қилди.
Маълум қилинишича, Мотуевyнинг ўлим сабаби ҳозирча аниқлаштирилмаган. У машҳурликка 2000 йиллар ўрталарида, Норин вилоятидаги Қора-Кече кўмир конини ўзлаштириш билан шуғулланган вақтда эришган. Қирғизистондаги 2005 йил март ойида юз берган оммавий норозилик намойишлари ва ҳокимият алмашинуви – “Лола инқилоби”дан кейин у корхона устидан назорат ўрнатиб олган.
Ўша даврда собиқ президент Аскар Акаев атрофидагилар билан боғлиқ раҳбарият табиий бойликларни тасарруф этиш ҳуқуқига эга эмаслигини билдирган. Қора-Кечени эгаллаб олганидан сўнг Нурлан Мотуевга “кўмир қироли” лақаби берилган. Унинг ўзи эса бу лақабга қарши чиқмаган.
2006 йил баҳорида Мотуев ИИВ ходимлари томонидан қўлга олинган. Тергов маълумотларига кўра, конда қарийб 168 минг тонна кўмир етишмагани аниқланган, етказилган зарар эса 71 миллион сомдан ортиқ баҳоланган. Кейинчалик давлат кон устидан назоратни қайта тиклаган.
У сиёсий фаолият билан ҳам фаол шуғулланган. Жумладан, 2009 йилда Нурлан Мотуев Қирғизистон президентлигига номзодини қўйган. Маълумотларга қараганда, Ссйловда у сайловчилар овозларининг бир фоизидан камроғини олган. Сўнгги йилларда эса “кўмир қироли” ижтимоий тармоқларда фаол блогер сифатида танилган.
