Россия Либерал-демократик партияси (ЛДПР) мигрантлар учун жисмоний шахслардан олинадиган даромад солиғи ставкасини 30 фоизгача оширишни таклиф қилди. Бу ҳақда Россия Давлат думаси Хавфсизлик ва коррупцияга қарши кураш қўмитаси раисининг биринчи ўринбосари, ЛДПР фракцияси раҳбарининг биринчи ўринбосари Андрей Луговой маълум қилди.
Унинг айтишича, мигрантлар Россия инфратузилмаси, тиббий хизматлар ва бошқа давлат имкониятларидан фойдаланади. Шу боис улар учун даромад солиғи ставкаси 30 фоизгача оширилиши керак. Луговой солиқ тўлашдан бўйин товлаган мигрантларни Россиядан депортация қилишни ҳам таклиф қилган.
“Агар тўламасангиз, мамлакатни тарк этасиз”, дейди депутат.
Шунингдек, ЛДПР вакили мигрантлар Россияга киришидан олдин махсус ҳисоб рақами очилиши кераклигини айтган. Унга мигрантнинг ўзи ёки иш берувчиси депортация, махсус сақлаш жойлари, суд харажатлари ва жарималарни қоплаш учун маблағ киритиши таклиф қилинмоқда.
Луговойнинг фикрича, миграция соҳасида ягона давлат назорат тизимини жорий этиш зарур. Бу тизим орқали чет эл фуқароларининг қаерда яшаётгани, қайси асосда мамлакатда бўлиб тургани, қаерда ишлаётгани, солиқ тўлаётгани ва қонунларга риоя қилаётганини назорат қилиш мумкин бўлади.
Ҳозирча мазкур таклифлар Россия қонунчилигига киритилган ўзгартишлар эмас, балки ЛДПР вакили томонидан билдирилган таклифлар ҳисобланади.
