Ўзбекистонда жорий йил якуни бўйича иқтисодий ўсиш суръатлари 7–7,5 фоиз атрофида шаклланиши кутилмоқда. Бу ҳақида Марказий банк бошқарувининг йиғилишида маълум қилинди.
“Иқтисодий фаоллик юқори даражада сақланиб, ўсиш суръатлари ўзининг потенциалидан баландроқ шаклланмоқда. Меҳнат бозоридаги талабнинг ортиши, савдо ва пуллик хизматлар тушумлари ва банклараро транзаксияларнинг ҳажми ўсиши ушбу тенденцияни намоён этмоқда. Жорий иқтисодий ва инвестицион фаоллик фонида йил якуни бўйича иқтисодий ўсиш суръатлари 7–7,5 фоиз атрофида шаклланиши кутилмоқда”, дейилади Марказий банк хабарида.
Маълумот учун, 2024-йилда Ўзбекистоннинг иқтисодий ўсиши ялпи ички маҳсулот (ЯИМ) бўйича 6% ни ташкил қилганди.
Шунингдек, йиғилишда жорий инфляциянинг пасаювчи динамикаси билан бир қаторда келгусида таклиф омиллари бўйича хатарлар сақланиб қолаётгани айтиб ўтилди.
Хусусан, айрим асосий озиқ-овқат товарлари таклифи билан боғлиқ хатарлар, сўнгги ойлардаги транспорт хизматлари нархларининг ошиши ҳамда тартибга солинадиган нархларнинг индексацияси билан боғлиқ иккиламчи таъсирлар шулар жумласидандир.
“Глобал молиявий шароитларнинг босқичма-босқич юмшаши фонида жаҳон иқтисодиёти кутилганидан юқори суръатларда ўсмоқда. Шу билан бирга, халқаро хом ашё бозорларидаги юқори нарх сақланиб қолмоқда. Бу эса келгусида ҳам мамлакатимиз экспорт тушумларини қўллаб-қувватлаб боради” дейилади хабарда.
Бундан ташқари, Марказий банк йиғилишида миллий валютадаги жамғармалар ҳажми ошаётгани ҳам маълум қилинди.
“Ички молия бозоридаги номинал фоиз ставкалар нисбатан барқарор шаклланиши фонида инфляция ва инфляцион кутилмалар пасайиши реал фоиз ставкаларининг юқори даражада шаклланишига хизмат қилиб, миллий валютада жамғаришни рағбатлантирмоқда. Бу муддатли депозитлар ҳажмининг юқори ўсиш суръатларида намоён бўлмоқда.
Шу билан бирга, молиявий инклюзивликнинг ошиши ҳисобига чакана кредитлаш суръатларининг юқори даражада сақланиб қолиши истеъмол фаоллиги юқорилигини акс эттириб, ялпи талабни қўллаб-қувватлаши орқали келгусида инфляцияга оширувчи босимни кучайтириши мумкин”, дейилади йиғилиш баёнида.
